മലപ്പുറം: നിയമസഭാ തെര‍ഞ്ഞെടുപ്പ് സ്ഥാനാർഥി നിർണയത്തിൽ അപ്രതീക്ഷിത ട്വിസ്റ്റുമായി മുസ്ലീം ലീ​​ഗ്. പികെ കുഞ്ഞാലിക്കുട്ടി മലപ്പുറത്തേക്ക് മാറാൻ സാധ്യത. കെഎം ഷാജിയെ വേങ്ങരയിൽ മത്സരിപ്പിക്കാനുള്ള സാധ്യതയും ഇതോടെ ശക്തമായി. കാസർകോട്ടെ പ്രാദേശിക എതിർപ്പ് പരി​ഗണിച്ചാണ് ഷാജിയെ വേങ്ങരയിൽ പരി​ഗണിക്കുന്നത്. ഷാജിക്ക് ഉറച്ച സീറ്റ് നൽകണമെന്നാണ് മുസ്ലീം ലീ​ഗ് സംസ്ഥാന അധ്യക്ഷൻ സാദിഖ് അലി തങ്ങളുടെ നിലപാട്.

സ്ഥാനാർഥി പ്രഖ്യാപനത്തിനു മുന്നോടിയായി മുസ്ലീം ലീ​ഗ് നേതൃയോ​ഗം മലപ്പുറത്ത് ചേർന്നിരുന്നു. കോൺ​ഗ്രസുമായുള്ള ഉഭയകക്ഷി ചർച്ചയിലെ തീരുമാനം കുഞ്ഞാലിക്കുട്ടി യോ​ഗത്തിൽ അറിയിച്ചു. ചർച്ചകൾ പൂർത്തിയായ കാര്യം അദ്ദേഹം മാധ്യങ്ങളോടു വെളിപ്പെടുത്തി.

സ്ഥാനാർഥികളായി പരി​ഗണിക്കുന്നവരെ കുറിച്ചുള്ള അഭിപ്രായം സാദിഖ് അലി തങ്ങൾ ഓരോ നേതാക്കളിൽ നിന്നും വ്യക്തിപരമായി ചോദിച്ചറിയുന്നുണ്ട്. മത്സരിക്കാനില്ലെന്നും ജനറൽ സെക്രട്ടറിയായി തുടരാനാണ് താത്പര്യമെന്നും പിഎംഎ സലാം നിലപാട് എടുത്തു. നാളെ പാണക്കാട് വച്ച് സാദിഖ് അലി തങ്ങൾ ലീ​ഗ് സ്ഥാനാർഥികളെ പ്രഖ്യാപിക്കും എന്നാണ് വിവരം.