തിരുവനന്തപുരം: സംസ്ഥാനത്തെ വെള്ളക്കാര്‍ഡ് ഉടമകള്‍ക്ക് സാധാരണ റേഷന്‍ വിഹിതമായി നവംബറില്‍ ആറ് കിലോഗ്രാം അരി ലഭിക്കും. കിലോഗ്രാമിന് 10.90 രൂപ നിരക്കിലാണ് നല്‍കുക. കഴിഞ്ഞ മാസം നാല് കിലോഗ്രാമാണ് നല്‍കിയത്.

ഇതേനിരക്കില്‍ രണ്ടുകിലോ ഗ്രാം അരിയാണ് ബ്രൗണ്‍ കാര്‍ഡിനുള്ള വിഹിതം. നീല വെള്ള ബ്രൗണ്‍ കാര്‍ഡ് ഉടമകള്‍ക്ക് ഈ മാസം സ്‌പെഷ്യല്‍ വിഹിതമായി മൂന്ന് കിലോഗ്രാം ഗോതമ്പ് കിലോഗ്രാമിന് 8.70 രൂപയ്ക്ക് അതത് താലൂക്കിലെ സ്റ്റോക്ക് അനുസരിച്ച് ലഭിക്കും. നീല, വെള്ള കാര്‍ഡ് കാര്‍ഡുകള്‍ക്ക് നാല് കിലോ വരെയും ബ്രൗണ്‍ കാര്‍ഡിന് ഒരു കിലോഗ്രാം ആട്ട കിലോഗ്രാമിന് പതിനേഴ് രൂപ നിരക്കില്‍ സ്റ്റോക്ക് അനുസരിച്ച് ലഭിക്കും.

ഒക്ടോബര്‍ മാസത്തെ റേഷന്‍ വിതരണം ഇന്നലെ അവസാനിച്ചു. ഞായറാഴ്ചയായതിനാല്‍ ഇന്നും പുതിയ സ്റ്റോക്ക് ക്രമീകരണത്തിനായി നാളെയും അവധിയാണ്. നവംബറില്‍ റേഷന്‍ വിതരണം മൂന്നിന് ആരംഭിക്കും.