ന്യൂഡല്ഹി: ഹേമ കമ്മിറ്റി റിപ്പോര്ട്ടില് കേസ് എടുത്ത് അന്വേഷണം നടത്താനുള്ള കേരള ഹൈക്കോടതി ഉത്തരവിനെതിരെ സുപ്രീം കോടതിയില് ഹര്ജി. ഉത്തരവ് അടിയന്തരമായി സ്റ്റേ ചെയ്യണമെന്ന ഹര്ജി സുപ്രീം കോടതി നാളെ പരിഗണിക്കും.
ഹേമകമ്മറ്റിയില് ലഭിച്ച മൊഴികളുടെ അടിസ്ഥാനത്തില് കേസ് രജിസ്റ്റര് ചെയ്ത് അന്വേഷണം നടത്താന് കേരള ഹൈക്കോടതി ഉത്തരവിട്ടിരുന്നു. ഇതിനെതിരെയാണ് നിര്മാതാവ് സജിമോന് പാറയില് സുപ്രീം കോടതിയില് ഹര്ജി നല്കിയിരിക്കുന്നത്. പ്രത്യേക അന്വേഷണ സംഘത്തോടാണ് എഫ്ഐഐആര് രജിസ്റ്റര് ചെയ്ത് തുടര്നടപടികള് സ്വീകരിക്കാന് ഹൈക്കോടതി നിര്ദേശിച്ചത്. ഇതിന്റെ അടിസ്ഥാനത്തില് പ്രത്യേക അന്വേഷണം സംഘം സ്വീകരിച്ച നടപടികള് അടിയന്തരമായി സ്റ്റേ ചെയ്യണമെന്നും സുപ്രീം കോടതിയില് ഫയല് ചെയ്ത ഹര്ജിയില് ആവശ്യപ്പെടുന്നു.
ഈ ഹര്ജി അടിയന്തരമായി കേള്ക്കണമെന്ന് ആവശ്യപ്പെട്ട് സജി മോന് പാറയിലിന്റെ അഭിഭാഷകന് സുപ്രീം കോടതിയില് ഒരു കത്ത് നല്കിയിരുന്നു. ഈ കത്തിന്റെ അടിസ്ഥാനത്തില് ഹര്ജി നാളെ പരിഗണിക്കാനാണ് സുപ്രീം കോടതിയുടെ തീരുമാനം. ജസ്റ്റിസുമാരായ വിക്രം നാഥ്, പിബി വരാലെ അടങ്ങുന്ന ബഞ്ചാണ് ഹര്ജി പരിഗണിക്കുന്നത്. സജിമോന് പാറയിലിന് വേണ്ടി സീനിയര് അഭിഭാഷകന് മുകുള് റോഹ്തഗി ആണ് ഹാജരാകുക.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates