ഏറ്റുമാനൂർ: കുടുംബ വഴക്കിനിടയിൽ മകൻ തള്ളിയിട്ടതിന് പിന്നാലെ കുഴഞ്ഞ് വീണ റിട്ട ഗ്രേഡ് എസ്ഐ മരിച്ചു. സംഭവത്തിൽ റിട്ട സൈനികനായ മകൻ ​ഗിരീഷിനെ പൊലീസ് കസ്റ്റഡിയിലെടുത്തു. ഏറ്റുമാനൂർ മാടപ്പാട് കുമ്പളത്ത് തറയിൽ സി മാധവൻ (87) ആണ് മരിച്ചത്. 

പോസ്റ്റുമോർട്ടത്തിന് ശേഷം മാത്രമേ മരണ കാരണം വ്യക്തമാകുകയുള്ളൂവെന്ന് പൊലീസ് പറഞ്ഞു. തിങ്കളാഴ്ച വൈകുന്നേരം നാലരയോടെയാണ് സംഭവം. വൈക്കത്ത് ഭാര്യ വീട്ടിലായിരുന്ന ഗിരീഷ് തിങ്കളാഴ്ചയാണ് വീട്ടിലെത്തിയത്. നന്നായി മദ്യപിച്ചെത്തിയ ഇയാൾ വീടിനുള്ളിൽ അസഭ്യം വർഷം നടത്തുന്നത് പിതാവ് ചോദ്യം ചെയ്തു. ഇതിൽ പ്രകോപിതനായ ഗിരീഷും പിതാവും തമ്മിൽ വാക്കേറ്റമുണ്ടായി. ഇതിനിടെ വീണാണ് മാധവൻ മരിച്ചതെന്ന് ഭാര്യ രാജമ്മ പൊലീസിൽ മൊഴി നൽകി. 

ഗിരീഷിന്റെ ഭാര്യയുമായി മാധവൻ വഴക്കിട്ടെന്നും ഇതേ ചൊല്ലിയാണ് തർക്കമുണ്ടായതെന്നും നാട്ടുകാർ പറയുന്നു. വീണ് പരിക്കേറ്റ മാധവനെ കാരിത്താസ് ആശുപത്രിയിൽ എത്തിച്ചെങ്കിലും മരണം സംഭവിച്ചിരുന്നു. ബിഎസ്എഫിൽ നിന്നും റിട്ടയർ ചെയ്ത ഗിരീഷ് മെഡിക്കൽ കോളജ് ആശുപത്രിയിൽ സെക്യൂരിറ്റി ജീവനക്കാരനായി ജോലി ചെയ്യുകയാണ്. 

ശാരീരിക അസുഖങ്ങൾ ഉള്ളയാളാണ് മാധവനെന്ന് പൊലീസിന് മൊഴി ലഭിച്ചിട്ടുണ്ട്. പലപ്പോഴും ബോധരഹിതനായി വീഴാറുണ്ടായിരുന്നതായും പറയുന്നു. പ്രാഥമിക പരിശോധനയിൽ ശരീരത്തിൽ പരിക്കുകളൊന്നും കണ്ടെത്തിയിട്ടില്ല. 

ഈ വാർത്ത കൂടി വായിക്കാം

തൊണ്ടയില്‍ മീന്‍മുള്ള് കുടുങ്ങി, നീക്കാന്‍ രണ്ട് വട്ടം ശസ്ത്രക്രിയ; വയോധിക മരിച്ചു

സമകാലിക മലയാളം ഇപ്പോൾ വാട്ട്‌സ്ആപ്പിലും ലഭ്യമാണ്. ഏറ്റവും പുതിയ വാർത്തകൾ അറിയാൻ ക്ലിക്ക് ചെയ്യൂ