പീസ് ബോണ്ടിനെതിരെ നൽകിയ ഹർജിയിൽ ഐസ ദേശീയ പ്രസിഡന്റ് നേഹ ബോറയ്ക്ക് തിരിച്ചടി. ടെണ്ടറില്ലാതെ കരാർ നൽകി അഴിമതി നടത്തിയെന്ന ആരോപണത്തിൽ പി പി ദിവ്യയ്ക്കെതിരെ വിജിലൻസ് അന്വേഷണം. സംസ്ഥാനത്ത് കന്ന മഴ തുടരുമെന്ന് മുന്നറിയിപ്പ്. ഇന്നത്തെ 5 പ്രധാന വാർത്തകൾ ( Top 5 News Today ) അറിയാം.

എസ്‌ഐആര്‍. വിരുദ്ധ പ്രതിഷേധവുമായി ബന്ധപ്പെട്ട് ഐസ ദേശീയ പ്രസിഡന്റ് നേഹ ബോറയ്ക്ക് തിരിച്ചടി. അന്വേഷണ സമയത്ത് സമാധാനം പാലിക്കുന്നതിനായും കീഴ്‌ക്കോടതിയില്‍ ഹാജരാകുന്നതിനായും 10,000 രൂപയുടെ ബോണ്ടും ആള്‍ജാമ്യവും നല്‍കാന്‍ ആവശ്യപ്പെട്ട് സ്‌പെഷ്യല്‍ എക്‌സിക്യൂട്ടീവ് മജിസ്‌ട്രേറ്റ് പുറപ്പെടുവിച്ച നോട്ടീസിനെതിരെ നേഹ ബോറ സമര്‍പ്പിച്ച ഹര്‍ജി ഡല്‍ഹി ഹൈക്കോടതി തള്ളി.

സിപിഎം നേതാവ് പിപി ദിവ്യക്കെതിരെ വിജിലന്‍സ് അന്വേഷണത്തിന് ഉത്തരവിട്ട് സര്‍ക്കാര്‍. കണ്ണുര്‍ ജില്ലാ പഞ്ചായത്ത് പ്രസിഡന്റായിരിക്കെ നടത്തിയ ക്രമക്കേടുകളിലാണ് അന്വേഷണം. ടെണ്ടര്‍ ഇല്ലാതെ കാര്‍ട്ടണ്‍ ഇന്ത്യ കമ്പനിക്ക് നിര്‍മാണ കരാര്‍ നല്‍കിയതെന്ന് കെഎസ് യു ഉപാധ്യക്ഷന്‍ മുഹമ്മദ് ഷമാസിന്റെ പരാതിയിലാണ് ആഭ്യന്തരവകുപ്പ് വിജിലന്‍സ് അന്വേഷണത്തിന് ഉത്തരവിട്ടത്. പിപി ദിവ്യയുടെയും ഭര്‍ത്താവിന്റെയും സ്വത്തും അന്വേഷിക്കും.

ബംഗാള്‍ ഉള്‍ക്കടലില്‍ ചുഴലിക്കാറ്റിന് സാധ്യത. തിങ്കളാഴ്ച രാവിലെയോടെ പടിഞ്ഞാറന്‍- മധ്യ ബംഗാള്‍ ഉള്‍ക്കടല്‍ രൂപപ്പെടുമെന്നാണ് കേന്ദ്ര കാലാവസ്ഥ വകുപ്പിന്റെ പ്രവചനം. നിലവില്‍ ഇരട്ട ന്യൂനമര്‍ദ്ദത്തിന്റെ സ്വാധീനഫലമായി സംസ്ഥാനത്ത് തിങ്കളാഴ്ച വരെ ഒറ്റപ്പെട്ട സ്ഥലങ്ങളില്‍ തീവ്രവും ശക്തവുമായ മഴയാണ് കാലാവസ്ഥ വകുപ്പ് പ്രവചിക്കുന്നത്. ഞായറാഴ്ച വരെ എല്ലാ ജില്ലകളിലും കേന്ദ്ര കാലാവസ്ഥ വകുപ്പ് മഴ മുന്നറിയിപ്പ് നല്‍കിയിട്ടുണ്ട്.

ഖത്തറിലെ കെഎംസിസി ഓഫീസിലെ ലോക്കറുകള്‍ തകര്‍ത്ത് 31 ലക്ഷം റിയാല്‍ ( എട്ടുകോടിയിലധികം ഇന്ത്യന്‍ രൂപ) കവര്‍ന്നത് 2025 സെപ്റ്റംബര്‍ 18ന് പുലര്‍ച്ചെയാണ്. എന്നാല്‍, ഇത്രയും വലിയൊരു കവര്‍ച്ച നടന്ന വിവരം പൊലീസിന്റെ മുന്നിലെത്തിയത് ഒരു വര്‍ഷത്തോളം വൈകി, 2026 സെപ്റ്റംബറില്‍ മാത്രവും. കവര്‍ച്ചയ്ക്ക് പിന്നിലെ ആസൂത്രണം മുതല്‍ പണം വീതംവെച്ചതിനെച്ചൊല്ലിയുള്ള തര്‍ക്കങ്ങളും വിവരങ്ങള്‍ പുറത്തുവന്നതിലെ കാലതാമസവും വരെ ഒട്ടേറെ ദുരൂഹതകള്‍ അവശേഷിക്കുന്നു.

ഏഷ്യന്‍ പാര ഗെയിംസില്‍ ചരിത്രനേട്ടം സ്വന്തമാക്കി ഇന്ത്യ. ജപ്പാനിലെ ഐച്ചി-നഗോയയില്‍ നടന്ന ഏഷ്യന്‍ പാര ഗെയിംസില്‍ ഇതുവരെയുള്ള എല്ലാ റെക്കോര്‍ഡുകളും തകര്‍ത്താണ് ഇന്ത്യയുടെ കുതിപ്പ്. 2022ല്‍ ഹാങ്ചൗവില്‍ കുറിച്ച 111 മെഡലുകളെന്ന എക്കാലത്തെയും മികച്ച റെക്കോര്‍ഡാണ് ഇന്ത്യന്‍ താരങ്ങള്‍ ഇത്തവണ തിരുത്തിക്കുറിച്ചത്. 30 സ്വര്‍ണം ഉള്‍പ്പെടെ ആകെ 113 മെഡലുകളാണ് ഇന്ത്യ ഇത്തവണ ഗെയിംസില്‍ വാരിക്കൂട്ടിയത്.