തിരുവനന്തപുരം: തിരുവനന്തപുരം മൃഗശാലയിലെ പ്രധാന ആകർഷണമായിരുന്ന അവസാനത്തെ ഇന്ത്യൻ ഒറ്റക്കൊമ്പൻ കാണ്ടാമൃഗം വാർദ്ധക്യസഹജമായ അസുഖങ്ങളെ തുടർന്ന് മരണമടഞ്ഞു. ജാദു എന്ന് ഔദ്യോഗിക നാമമുള്ള ഈ കാണ്ടാമൃഗത്തെ 'ശംഭു' എന്നാണ് മൃഗശാല അധികൃതരും ജീവനക്കാരും സന്ദർശകരും സ്നേഹത്തോടെ വിളിച്ചിരുന്നത്. വെള്ളിയാഴ്ച രാത്രിയോടെയായിരുന്നു 39 വയസ്സുള്ള ശംഭുവിന്റെ അന്ത്യം.

1993 മെയ് 19-നാണ് അസമിലെ ഗുവാഹത്തിയിലുള്ള അസം സ്റ്റേറ്റ് സുവോളജിക്കൽ പാർക്കിൽ നിന്ന് ജാദു എന്ന ശംഭുവിനെ തിരുവനന്തപുരം മൃഗശാലയിലെത്തിച്ചത്. കഴിഞ്ഞ മൂന്ന് പതിറ്റാണ്ടിലേറെയായി തലസ്ഥാനത്തെ മൃഗശാലയിലെത്തുന്ന ആയിരക്കണക്കിന് സന്ദർശകരുടെ മനംകവർന്ന പ്രധാന വന്യജീവി സാന്നിധ്യങ്ങളിൽ ഒന്നായിരുന്നു ശംഭു. ഈ കാണ്ടാമൃഗത്തെക്കൂടാതെ മുൻപ് മൃഗശാലയിലുണ്ടായിരുന്ന മറ്റൊരെണ്ണം 2008-ൽ ചത്തതിനെത്തുടർന്ന് ഇവിടെ അവശേഷിച്ചിരുന്ന ഏക കാണ്ടാമൃഗമായിരുന്നു ഇത്. സാധാരണയായി ഇന്ത്യൻ ഒറ്റക്കൊമ്പൻ കാണ്ടാമൃഗങ്ങളുടെ ശരാശരി ആയുസ്സ് 35 മുതൽ 40 വർഷം വരെയാണെന്ന് അധികൃതർ വ്യക്തമാക്കി.

വാർദ്ധക്യസഹജമായ ശാരീരിക അസ്വസ്ഥതകളെ തുടർന്ന് കഴിഞ്ഞ ഏതാനും ദിവസങ്ങളായി ശംഭു പ്രത്യേക പരിചരണത്തിലും ചികിത്സയിലുമായിരുന്നു. തിരുവനന്തപുരം മൃഗശാല വെറ്ററിനറി സർജൻ ഡോ. നികേഷ് കിരൺ, പാലോട് സ്റ്റേറ്റ് ഇൻസ്റ്റിറ്റ്യൂട്ട് ഫോർ അനിമൽ ഡിസീസസിലെ പത്തോളജിസ്റ്റ് ഡോ. ഹരീഷ് എന്നിവരുടെ നേതൃത്വത്തിൽ പോസ്റ്റ്‌മോർട്ടം നടപടികൾ പൂർത്തിയാക്കി. തുടർന്ന് ശനിയാഴ്ച വൈകുന്നേരത്തോടെ മൃഗശാല വളപ്പിൽ തന്നെ സംസ്കരിച്ചു

പ്രായമേറിയ മൃഗങ്ങളിൽ കണ്ടുവരുന്ന 'ഡൈലേറ്റഡ് കാർഡിയോമയോപ്പതി' എന്ന ഹൃദയസംബന്ധമായ അസുഖമാണ് കാണ്ടാമൃഗത്തിന്റെ മരണകാരണമെന്ന് പോസ്റ്റ്‌മോർട്ടം പരിശോധനയിൽ വ്യക്തമായതായി വെറ്ററിനറി സർജൻ ഡോ. നികേഷ് കിരൺ അറിയിച്ചു. പ്രായം ഏറിയതിനെത്തുടർന്ന് ഹൃദയപേശികൾക്ക് തേയ്മാനവും ബലക്ഷയവും സംഭവിക്കുന്ന അവസ്ഥയാണിത്. ശംഭുവിന്റെ വിയോഗത്തോടെ തിരുവനന്തപുരം മൃഗശാലയിലെ ഒറ്റക്കൊമ്പൻ കാണ്ടാമൃഗങ്ങളുടെ സാന്നിധ്യത്തിനാണ് വിരാമമായിരിക്കുന്നത്.

The last Indian one-horned rhinoceros at the Thiruvananthapuram Zoo, affectionately known as 'Shambhu' (officially named 'Jadoo'), passed away due to age-related ailments on Friday night