തൃശൂർ :  തൃശൂർ മെഡിക്കൽ കോളേജിൽ കോവിഡ് രോഗിക്കായി എത്തിച്ച പൊതിച്ചോറിൽ കഞ്ചാവ് പൊതികൾ കണ്ടെത്തി. 10 ഗ്രാം വീതമുള്ള 3 കഞ്ചാവ് പൊതികളാണ് പൊതിച്ചോറിൽ ഒളിപ്പിച്ച നിലയിൽ കണ്ടെത്തിയത്.  ഭക്ഷണം കൊടുക്കുന്നതിനു തൊട്ടുമുൻപ് നടത്തിയ പരിശോധനയിലാണ് ഇവ കണ്ടെടുത്തത്. 

തൃശൂർ മെഡിക്കൽ കോളേജിൽ കോവിഡ് രോഗികൾക്കായുള്ള വാർഡിൽ രാവിലെയാണ് സംഭവം.  വിയ്യൂർ ജയിലിൽ നിന്ന് കോവിഡ് ബാധിച്ച് ഇവിടെത്തിയ തടവുകാരനായിട്ടാണ് കഞ്ചാവ് എത്തിച്ചതെന്നാണ് സംശയം. 

രോഗികളുടെ ബന്ധുക്കൾ കൊണ്ടു വരുന്ന ഭക്ഷണവും തൃശൂർ മെഡിക്കൽ കോളേജിൽ കോവിഡ് രോ​ഗികൾക്ക് അനുവദിക്കാറുണ്ട്. ഇത്തരത്തിലുള്ള പൊതികൾ ആശുപത്രി അധികൃതർ സ്വീകരിച്ചശേഷം രോഗികൾക്കു കൈമാറുകയാണ് പതിവ്.