തിരുവനന്തപുരം: കോവിഡ് നിയന്ത്രണങ്ങൾ അശാസ്ത്രിയമാണെന്ന വിമർശനവുമായി പ്രതിഷേധം ശക്തമാവുന്നതിന് ഇടയിൽ ഇന്ന് മന്ത്രിസഭാ യോ​ഗം ചേരും. ഇടവേളകളില്ലാതെ കടകൾ തുറക്കാൻ അനുവദിക്കണം എന്ന വ്യാപാരികളുടെ ആവശ്യം മന്ത്രിസഭാ യോ​ഗത്തിന്റെ പരി​ഗണനയ്ക്ക് വരും.

‌നിലവിലെ കോവിഡ് സാഹചര്യം മന്ത്രിസഭാ യോഗം വിലയിരുത്തും. പെരുന്നാളിനെ തുടർന്ന് കൂടുതൽ ഇളവുകൾ വേണമെന്ന ആവശ്യം ശക്തമാണ്. വ്യാപാരികളുമായി മുഖ്യമന്ത്രി വെള്ളിയാഴ്ച നേരിട്ട് ചർച്ച നടത്തുന്നുണ്ട്.

ഷൂട്ടിംഗിന് അനുമതി നൽകണമെന്ന ആവശ്യമാണ് മന്ത്രിസഭാ യോ​ഗത്തിന് മുൻപിലേക്ക് എത്തുന്ന മറ്റൊന്ന്. പല സിനിമകളുടേയും ചിത്രീകരണം മറ്റ് സംസ്ഥാനങ്ങളിലേക്ക് മാറ്റുന്ന വിഷയവും ചർച്ച ചെയ്യും. ലോക്ഡൗൺ ഇളവ് സംബന്ധിച്ച അവലോകനയോഗം ചേരുന്നത് ശനിയാഴ്ചയാണെങ്കിലും കൂടുതൽ ഇളവുകൾ വേണമെന്ന ആവശ്യമുയരുന്ന സാഹചര്യത്തിൽ ഇത് സംബന്ധിച്ച് തീരുമാനമുണ്ടായേക്കുമെന്നാണ് വിലയിരുത്തപ്പെടുന്നത്.