തിരുവനന്തപുരം; തിരുവനന്തപുരം പട്ടത്ത് ട്രാഫിക് എസ്ഐയുടെ പരാക്രമം. കാർ ഓടിച്ചെത്തി റോഡരുകില്‍ നിർത്തിയിട്ടിരുന്ന ബൈക്കുകള്‍ ഇടിച്ചു തെറിപ്പിക്കുകയായിരുന്നു. ട്രാഫിക് എസ്ഐ അനില്‍കുമാറാണ് അപകടമുണ്ടാക്കിയത്. എസ്ഐ മദ്യപിച്ചിരുന്നതായി നാട്ടുകാര്‍ ആരോപിച്ചു.

കാറിനുള്ളിൽ പൊലീസ് യൂണിഫോമും തൊപ്പിയും

ഞായറാഴ്ച രാത്രി 8.30ന് പട്ടത്തുവച്ചാണ് സംഭവമുണ്ടായത്. ബൈക്കുകളുടെ ഉടമസ്ഥർ നോക്കിനിൽക്കെയാണ് നിയന്ത്രണംവിട്ട കാർ ബൈക്കുകൾ നിർത്തിയിട്ടിരുന്ന ഭാഗത്തേക്കു ഇടിച്ചുകയറിയത്. ഇടിയുടെ ആഘാതത്തിൽ രണ്ടു ബൈക്കുകൾക്ക് കേടുപാടുണ്ടായി. എസ്ഐ ഡ്യൂട്ടി കഴിഞ്ഞു മടങ്ങവെയാണ് അപകടമുണ്ടായതെന്നാണ് വിവരം. 

കാറിനുള്ളിൽ എസ്ഐയുടെ യൂണിഫോമും തൊപ്പിയും ഉണ്ടായിരുന്നു. അപകടവിവരം അറിഞ്ഞ് പൊലീസ് എത്തി  പൊലീസ് വാഹനത്തിൽ എസ്ഐയെ സ്ഥലത്തുനിന്നുമാറ്റി. കാറും നീക്കം ചെയ്തു. സംഭവ സ്ഥലത്തുണ്ടായിരുന്നവർ എടുത്ത വിഡിയോ ദൃശ്യങ്ങൾ പുറത്തുവന്നു.