കോഴിക്കോട്: താമരശ്ശേരി ചുരത്തില്‍ മരം വീണ് ഗതാഗതം പൂര്‍ണ്ണമായി തടസ്സപ്പെട്ടു. വൈകുന്നേരം നാലരയോടെയാണ് ചുരത്തില്‍ മരം വീണത്. ചുരത്തിലെ രണ്ടാം വളവിലാണ് മരം വീണത്. മരം മുറിച്ചുമാറ്റി ഗതാഗതം പുനസ്ഥാപിക്കുന്നതിനായി ഫയര്‍ഫോഴ്‌സ് സംഘം സ്ഥലത്തെത്തി.

റോഡിലേക്ക് വീണ മരം മുറിച്ചുമാറ്റാനുള്ള ജോലികള്‍ ആരംഭിച്ചിട്ടുണ്ട്. നിലവില്‍ ചുരത്തില്‍ മഴയില്ലാത്തത് വലിയ ആശ്വാസമാകുന്നുണ്ട്. മണിക്കൂറുകളായി തുടരുന്ന വലിയ ഗതാഗതക്കുരുക്കില്‍ പെട്ട് നിരവധി യാത്രാക്കാര്‍ കുടുങ്ങി.പ്രതികൂല കാലാവസ്ഥ ഇല്ലാത്തതിനാല്‍ മരം മുറിച്ചുമാറ്റുന്ന ജോലികള്‍ വളരെ വേഗത്തിലാണ് പുരോഗമിക്കുന്നത്.

ചെറിയ ഇരുചക്ര വാഹനങ്ങള്‍ മുതല്‍ അത്യാസന്ന നിലയിലുള്ള രോഗികളുമായി പോകുന്ന ആംബുലന്‍സുകള്‍ വരെ നിലവില്‍ ചുരത്തില്‍ കുടുങ്ങിക്കിടക്കുകയാണ്. രാത്രി ഒന്‍പത് മണിക്ക് അതിര്‍ത്തി കടക്കേണ്ട ദീര്‍ഘദൂര ബസ്സുകളും ബംഗളൂരുവിലേക്ക് പുറപ്പെട്ടവരും ഉള്‍പ്പെടെയുള്ളവര്‍ ചുരത്തില്‍ കുടുങ്ങിയിരിക്കുന്നത്. മരം മുറിച്ചുമാറ്റുന്ന ജോലികള്‍ വേഗത്തില്‍ തീര്‍ത്ത് എത്രയും വേഗം വാഹനങ്ങള്‍ കടത്തിവിടാനുള്ള ശ്രമത്തിലാണ് അധികൃതര്‍.