തിരുവനന്തപുരം: തദ്ദേശ തെരഞ്ഞെടുപ്പില്‍ കേരളം ഒന്നടങ്കം അലയടിച്ച യുഡിഎഫ് തരംഗത്തിന് പിന്നാലെ പാലക്കാട് എംഎല്‍എ രാഹുല്‍ മാങ്കൂട്ടത്തിലിനെതിരെ ഒളിയമ്പുമായി യൂത്ത് കോണ്‍ഗ്രസ് നേതാവ് സജന ബി സാജന്‍. 'കളയേണ്ടത് കളഞ്ഞപ്പോള്‍ കിട്ടേണ്ടത് കിട്ടി...' എന്നായിരുന്നു സജന ഫെയ്‌സ്ബുക്കില്‍ കുറിച്ചത്.

തദ്ദേശ തെരഞ്ഞെടുപ്പില്‍ 941 ഗ്രാമപഞ്ചായത്തുകളില്‍ 504 ഇടത്തും 86 മുന്‍സിപ്പാലിറ്റികളില്‍ 54 ഇടത്തും ആറു കോര്‍പ്പറേഷനുകളില്‍ നാലിടത്തും യുഡിഎഫ് ആണ് ജയിച്ചത്. 14 ജില്ലാപഞ്ചായത്തുകളില്‍ 7 എണ്ണവും യുഡിഎഫ് ആണ് സ്വന്തമാക്കിയത്. ഇതിന് പിന്നാലെ കേരളത്തില്‍ യുഡിഎഫ് തരംഗം എന്ന് പരാമര്‍ശിച്ച് സജന പങ്കുവെച്ച കുറിപ്പിലാണ് രാഹുല്‍ മാങ്കൂട്ടത്തിലിനെതിരെ പരോക്ഷ സൂചന നല്‍കിയത്. 'കളയേണ്ടത് കളഞ്ഞപ്പോള്‍ കിട്ടേണ്ടത് കിട്ടി...കേരളത്തില്‍ യുഡിഫ് തരംഗം...തദ്ദേശം പിടിച്ചടക്കി...'- എന്നാണ് സജനയുടെ പോസ്റ്റ്.

സജനയുടെ പോസ്റ്റിന് കീഴില്‍ അസഭ്യവര്‍ഷവുമായി കോണ്‍ഗ്രസ് പ്രവര്‍ത്തകര്‍ തന്നെ എത്തിയിട്ടുണ്ട്. രാഹുലിനെയല്ല സജനയെയാണ് പുറത്താക്കേണ്ടത് എന്നാണ് ഇക്കൂട്ടരുടെ വാദം.