തിരുവനന്തപുരം: മലപ്പുറം അരീക്കോട് മാലിന്യക്കുഴിയില് വീണ് മൂന്ന് അതിഥി തൊഴിലാളികള് മരിച്ച സംഭവത്തില് അന്വേഷണത്തിന് ഉത്തരവിട്ട് തൊഴില് മന്ത്രി വി ശിവന്കുട്ടി. സംഭവത്തില് ലേബര് കമീഷണര് അന്വേഷണം നടത്തും. തൊഴിലാളികളുടെ മൃതദേഹങ്ങള് നാട്ടിലെത്തിക്കാനുള്ള നടപടികള് സ്വീകരിക്കുമെന്നും നിയമപ്രകാരം അര്ഹമായ നഷ്ടപരിഹാരം ഉറപ്പാക്കുമെന്നും മന്ത്രി വി ശിവന്കുട്ടി അറിയിച്ചു.
ബുധനാഴ്ച്ച ഒന്നോടെ അരീക്കോട് വടക്കുംമുറിയിലെ മാലിന്യ സംസ്കരണ പ്ലാന്റിലാണ് മൂന്ന് അതിഥി തൊഴിലാളികള് മരിച്ചത്. വികാസ് കുമാര്, ഹിതേഷ് ശരണ്യ, സമദ് അലി എന്നിവരാണ് മരിച്ചത്. രണ്ട് പേര് ബിഹാര് സ്വദേശികളും ഒരാള് അസം സ്വദേശിയുമാണ്. സ്വകാര്യ വ്യക്തിയുടെ കോഴിമാലിന്യ സംസ്കരണ പ്ലാന്റിലാണ് അപകടം.കോഴി മാലിന്യ സംസ്കരണ യൂണിറ്റിലെ വാട്ടര് ടാങ്കിലിറങ്ങിയ തൊഴിലാളികളാണ് അപകടത്തില്പ്പെട്ടത്.
ടാങ്കില് കുടുങ്ങിയ തൊഴിലാളിയെ രക്ഷിക്കാനിറങ്ങിയ മറ്റ് രണ്ട് തൊഴിലാളികളും അകപ്പെടുകയായിരുന്നു.തൊഴിലാളികളെ ആദ്യം അരീക്കോട് സര്ക്കാര് ആശുപത്രിയിലും തുടര്ന്ന് മഞ്ചേരി മെഡിക്കല് കോളജിലും എത്തിച്ചെങ്കിലും ജീവന് രക്ഷിക്കാനായില്ല. മൃതദേഹം മഞ്ചേരി മെഡിക്കല് കോളജില് സൂക്ഷിച്ചിരിക്കുകയാണ്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates