കോഴിക്കോട്: അമ്പായത്തോട് പ്രവര്‍ത്തിക്കുന്ന അറവു മാലിന്യ കേന്ദ്രത്തിനെതിരെ നടന്ന ജനകീയ സമരത്തില്‍ സംഘര്‍ഷം. പ്രതിഷേധത്തിനിടെ നാട്ടുകാര്‍ തീയിട്ടതോടെ ഫാക്ടറി കത്തിനശിച്ചു. റൂറല്‍ എസ്പി കെഇ ബൈജുവിനും സിഐയ്ക്കും സംഘര്‍ഷത്തില്‍ പരിക്കേറ്റു. ഇതോടെ പൊലീസ് നിരവധി തവണ ഗ്രനേഡ് പ്രയോഗിച്ചു.

അഗ്‌നിരക്ഷാ സേന പ്രവര്‍ത്തകര്‍ എത്തിയെങ്കിലും പ്രദേശവാസികള്‍ അഗ്‌നിരക്ഷാ സേന വാഹനങ്ങള്‍ തടഞ്ഞിട്ടിരിക്കുകയാണ്. സ്ഥലത്ത് വലിയ സംഘര്‍ഷാവസ്ഥയാണ് നിലനില്‍ക്കുന്നത്. പ്രതിഷേധക്കാരെ പിരിച്ചുവിടാന്‍ നോക്കിയതോടെയാണ് സംഘര്‍ഷം രൂക്ഷമായത്. തുടര്‍ന്ന് പ്രതിഷേധക്കാരും പൊലീസുമായി ഏറ്റുമുട്ടലുണ്ടാകുകയായിരുന്നു.

പിന്നാലെ പൊലീസിന് നേരെ കല്ലേറുണ്ടായി. ഇതോടെയാണ് റൂറല്‍ എസ്പിക്ക് പരുക്കേറ്റത്. എസ്പിയെ കോഴിക്കോട്ടെ സ്വകാര്യ ആശുപത്രിയിലേക്ക് മാറ്റും. ഉത്തരമേഖല ഐജി അടക്കമുള്ള ഉന്നത പൊലീസ് സംഘം ഉടന്‍ സ്ഥലത്തെത്തും. കൂടുതല്‍ പൊലീസിനെ സ്ഥലത്ത് വിന്യസിച്ചിട്ടുണ്ട്.