കൊച്ചി: നടി ആക്രമിക്കപ്പെട്ടതിന്റെ വാര്‍ഷിക ദിനമായ ചൊവ്വാഴ്ച( ഫെബ്രുവരി 17) 'അവള്‍ക്കൊപ്പം' ക്യാംപെയ്‌നുമായി ഡബ്ല്യൂസിസി. സംസ്ഥാനത്ത് മൂന്നിടങ്ങളില്‍ മെഴുകുതിരി തെളിയിക്കും. തിരുവനന്തപുരം മാനവീയം, മറൈന്‍ ഡ്രൈവ്, മാനാഞ്ചിറ എന്നിവിടങ്ങളിലാണ് പരിപാടി സംഘടിപ്പിക്കുക എന്ന് ഡബ്ല്യൂസിസി ഫെയ്‌സ്ബുക്ക് കുറിപ്പിലൂടെ അറിയിച്ചു.

കുറിപ്പ്:

2017 ഫെബ്രുവരി 17 ഏറ്റവും ഇരുണ്ട ദിവസമായിരുനെങ്കിലും, അതേ ദിവസമായിരുന്നു അവള്‍ സധൈര്യം അനീതിക്കെതിരെ പ്രതികരിച്ചത് . അവളുടെ പോരാട്ടത്തിനായി നമ്മള്‍ ഒരുമിച്ച് നില്‍ക്കുമെന്ന തീരുമാനത്തോടെയായിരുന്നു അവള്‍ക്കൊപ്പം എന്ന പ്രസ്ഥാനം പിറന്നത്.

കഴിഞ്ഞ 9 വര്‍ഷമായി കേരളത്തിന്റെ സാമൂഹിക പരിവര്‍ത്തനത്തില്‍ ഒരു ചെറിയ പങ്കു വഹിച്ച ഈ പ്രസ്ഥാനം ഇരയാക്കപ്പെട്ടവരെ അതിജീവിതകളാക്കാന്‍ നിരന്തരം പ്രവര്‍ത്തിച്ചു.

പിന്തുണയ്ക്കും ഐക്യദാര്‍ഢ്യത്തിനും എല്ലാവര്‍ക്കും നന്ദി പറഞ്ഞുകൊണ്ട്, WCC അവള്‍ക്കൊപ്പവും, അതിജീവിച്ച എല്ലാവര്‍ക്കും ഒപ്പം നില്‍ക്കുന്നവരെ ഈ യാത്രയുടെ ഭാഗമാവാന്‍ ക്ഷണിക്കുന്നു. ഇരുട്ടിന്റെ മറ നീക്കി നമുക്ക് വെളിച്ചത്തിന്റെ തിരി തെളിക്കാം .