കൊല്ലം: നടുറോഡിൽ പ്രസവവേദനയിൽ പിടഞ്ഞ പൂർണ ഗർഭിണിക്ക് തുണയായത് യുവാവും സുഹൃത്തുക്കളും.  ചവറ സ്വദേശിനിയായ യുവതിക്കാണ് ഓട്ടോറിക്ഷയിൽ ആശുപത്രിയിലേക്ക് പോകുംവഴി വേദന കഠിനമായത്. ഒടുവിൽ യുവാക്കളെത്തിയ വാഹനത്തിൽ കയറ്റി ആശുപത്രിയിലേക്ക് പോകുംവഴി യുവതി കുഞ്ഞിന് ജന്മം നൽകി.

ഓട്ടോയിൽ യുവതിയെ കൊല്ലം ഗവണ്‍മെന്‍റ് വിക്ടോറിയ ആശുപത്രിയിലേക്ക് കൊണ്ടുപോകും വഴിയാണ് വേദന കലശലായത്. ഓട്ടോ ഡ്രൈവർ റോഡിൽ ഇറങ്ങി പല വാഹനയാത്രക്കാരോടും സഹായമഭ്യർത്ഥിച്ചെങ്കിലും ആരും സഹായത്തിനെത്തിയില്ല. ഇതിനിടയിലാണ് ആ വഴി വന്ന ക്ലാപ്പന സ്വദേശി കമാൽ ആർ ദേവും സുഹൃത്തുക്കളും യുവതിയെ തങ്ങളുടെ കാറിൽ കയറ്റി ആശുപത്രിയിലേക്ക് എത്തിക്കാൻ തയ്യാറായത്. എന്നാൽ കാറിൽ വെച്ച് തന്നെ യുവതി പെൺകുഞ്ഞിന് ജന്മം നൽകി.

കുഞ്ഞും അമ്മയും ആരോഗ്യം വീണ്ടെടുക്കുന്നുവെന്നും ഇരുവർക്കും മറ്റ് പ്രശ്‌നങ്ങൾ ഒന്നും ഇല്ലായെന്നും ആശുപത്രി അധികൃതർ അറിയിച്ചു.