ആലപ്പുഴ: യുകെജി വിദ്യാര്‍ത്ഥിയായ മൂത്ത മകനെ സ്‌കൂള്‍ ബസില്‍ കയറ്റിവിടാന്‍ വീടിനു പുറത്തേക്കിറങ്ങിയ അമ്മ അറിയാതെ പിന്നാലെ വന്ന ഒന്നര വയസുകാരന്‍ സമീപത്തെ വെള്ളക്കെട്ടില്‍ വീണു മരിച്ചു. കായംകുളത്തിന് പടിഞ്ഞാറ് കീരിക്കാട് ജെട്ടി ചാച്ചിപനയില്‍ ഷൈന്‍ ആര്‍ പിള്ള-  ശ്രുതി ദമ്പതികളുടെ മകന്‍ ധ്യാന്‍ (കേശു) ആണ് മരിച്ചത്. ഇന്നലെ രാവിലെ ഒന്‍പതിനായിരുന്നു സംഭവം.

മൂത്തകുട്ടി ധ്രുവതിനെ കൂട്ടി റോഡിലേക്കു പോയതായിരുന്നു ശ്രുതി. ഈ സമയം വീടിന് പുറത്തിറങ്ങിയ ധ്യാന്‍ വെള്ളക്കെട്ടില്‍ വീഴുകയായിരുന്നു. മകനെ സ്‌കൂള്‍ ബസില്‍ കയറ്റിവിട്ട് തിരികെ വരുമ്പോഴാണ് കേശു വെള്ളത്തില്‍ മുങ്ങിക്കിടക്കുന്നത് ശ്രുതി കണ്ടത്. അമ്മയും സമീപ വാസികളും ചേര്‍ന്ന് കരയ്‌ക്കെടുത്ത് ഉടനെ ആശുപത്രിയിലേക്കു കൊണ്ടുപോയെങ്കിലും ജീവന്‍ രക്ഷിക്കാനായില്ല.