കൊച്ചി : പ്രളയ ജലത്തിൽ നിന്ന് ജീവിതത്തിലേക്ക് കൈപിടിച്ചുയർത്തിയവർക്ക് നന്ദി പ്രകാശിപ്പിച്ചുകൊണ്ട് കൊച്ചിയിലെ ടെറസിലെ ചിത്രം സമൂഹ മാധ്യമങ്ങളിൽ ഏറെ വൈറലായിരുന്നു. എന്നാൽ ആ 'താങ്ക്സ്' അച്ഛന്റെ മുണ്ടു കീറിയാണെന്ന്, നന്ദി പ്രകാശിപ്പിച്ച് എഴുതിയ നോർത്ത് പറവൂർ കിഴക്കേ കടുങ്ങല്ലൂർ മുല്ലേപ്പിള്ളി വീട്ടിൽ ധനപാലൻ പറയുന്നു. 

വെള്ളത്തിലൂടെ നീന്തി വന്ന അച്ഛൻ അഴിച്ചിട്ട ഡബിൾ മുണ്ടു കീറിയാണ്  ആ അക്ഷരങ്ങൾ എഴുതിയത്. വെള്ളപ്പൊക്കത്തിൽ നിന്ന് തന്നെയും കുടുംബത്തെയും ഹെലികോപ്റ്ററിൽ അല്ല രക്ഷിച്ചത്.  എന്നാൽ സമീപത്തെ വീടുകളിലെ പ്രായമായവരെ ഉൾപ്പെടെ എയർലിഫ്റ്റ് ചെയ്യുകയായിരുന്നു. അതിനുള്ള നന്ദിയാണ് പ്രകാശിപ്പിച്ചത്.  ധനപാലൻ പറയുന്നു.  മുകളിലുള്ളവനുളള' നന്ദി കൂടി ആ താങ്ക്സിലുണ്ട്– ധനപാലൻ കൂട്ടിചേർത്തു. 

രക്ഷാപ്രവർത്തകർക്ക് നന്ദി പ്രകാശിപ്പിച്ചുകൊണ്ടുള്ള ചിത്രം നേവിയും വാർത്താ ഏജൻസിയായ എഎൻഐയും പങ്കുവെച്ചിരുന്നു. നേവി വക്താവ് ഔദ്യോ​ഗിക ട്വിറ്റർ അക്കൗണ്ടിലൂടെയാണ് ചിത്രം പുറത്തുവിട്ടത്. ഇതോടെ ഇത് സോഷ്യൽ മീഡിയയിൽ അടക്കം തരം​ഗമാകുകയും ചെയ്തിരുന്നു.