കൊച്ചി: കൂടത്തായി കൊലപാതക പരമ്പരയുമായി സാദൃശ്യമുള്ള സന്ദർഭങ്ങളാണ് സ്വകാര്യ ചാനൽ സംപ്രേക്ഷണം ചെയ്യുന്ന സീരിയലിൽ ഉള്ളതെന്നു കാട്ടി പൊലീസ് ഹൈക്കോടതിയിൽ സത്യവാങ്മൂലം നൽകി. കോഴിക്കോട് റൂറൽ എസ്പി കെജി സൈമൺ ആണ് സത്യവാങ്മൂലം നൽകിയിരിക്കുന്നത്.

'കൂടത്തായി ദ ​ഗെയിം ഓഫ് ഡെത്ത്' എന്ന സീരിയൽ സംപ്രേക്ഷണം ചെയ്യുന്നത് ഹൈക്കോടതി സ്റ്റേ ചെയ്തിരിക്കുകയാണിപ്പോൾ. കേസിലെ മുഖ്യ സാക്ഷിയായ അന്താനത്ത് മുഹമ്മദിന്റെ ഹർജിയിലായിരുന്നു ഇത്. ഈ ഹർജിയിലാണ് പൊലീസിന്റെ റിപ്പോർട്ട് തേടിയത്.

സീരിയലിന്റെ സ്ക്രിപ്റ്റ് ലഭ്യമല്ലാത്തതിനാൽ മൊത്തം കഥയെക്കുറിച്ച് അറിയില്ലെന്നും പൊലീസിന്റെ സത്യവാങ്മൂലത്തിൽ പറയുന്നു. കൂടത്തായി കൊലപാതക പരമ്പരയിലെ മൂന്ന് കേസുകളിൽ അന്വേഷണം പൂർത്തിയാക്കി അന്തിമ റിപ്പോർട്ട് നൽകി. മൂന്നെണ്ണത്തിൽ അന്വേഷണം തുടരുകയാണെന്നും സത്യവാങ്മൂലത്തിൽ പറയുന്നു. ഹർജി വിധി പറയാൻ മാറ്റിയ കോടതി അതുവരെ സീരിയലിന്റെ പ്രദർശനത്തിനുള്ള സ്റ്റേ തുടരാൻ നിർദ്ദേശിച്ചു.