തിരുവനന്തപുരം : തബല വായിച്ച് കെഎസ്ആര്‍ടിസി എംഡി സ്ഥാനം ഏറ്റെടുത്ത ടോമിന്‍ തച്ചങ്കരി, കോര്‍പ്പറേഷനിലെ ആദ്യദിനവും സംഭവബഹുലമാക്കി. എല്‍എംഎസ് ജംഗ്ഷനില്‍ നിന്ന് സെക്രട്ടേറിയറ്റിലേക്കും, അവിടെ നിന്ന് കിഴക്കേകോട്ടയിലേക്കും കെഎസ്ആര്‍ടിസി ബസില്‍ കന്നി യാത്ര നടത്തി. ജീവനക്കാരോടും യാത്രക്കാരോടും കുശലാന്വേഷണം നടത്തിയായിരുന്നു കന്നിയാത്ര.
തുടര്‍ന്ന് ഓഫീലെത്തിയ തച്ചങ്കരി കോര്‍പ്പറേഷനില്‍ നടപ്പാക്കാനുദ്ദേശിക്കുന്ന പദ്ധതികളെക്കുറിച്ച് ഗതാഗതമന്ത്രി എ കെ ശശീന്ദ്രനുമായി ചര്‍ച്ച നടത്തി. രാത്രി ഏഴരയോടെ തമ്പാനൂര്‍ സെന്‍ട്രല്‍ ഡിപ്പോയില്‍ മിന്നല്‍ പരിശോധന. ഡ്യൂട്ടി അവസാനിപ്പിച്ച് സ്ഥലംവിടാനുള്ള തത്രപ്പാടിലായിരുന്നു അപ്പോള്‍ ജീവനക്കാര്‍.
ഈ സമയത്തായിരുന്നു ലൈറ്റുപോലും ഇടാതെ ഇന്നോവ കാറില്‍ തച്ചങ്കരിയെത്തുന്നത്. കാറുകാരനെ കൈകാര്യം ചെയ്യാനെത്തിയ സെക്യൂരിറ്റി, യാത്രക്കാരനെ കണ്ട് ഒന്നമ്പരന്നു. ഉടന്‍ തന്നെ പുതിയ എംഡിയുടെ മിന്നല്‍ സന്ദര്‍ശനം ജീവനക്കാരെ കര്‍ത്തവ്യനിരതരാക്കി. വീട്ടില്‍പോകാന്‍ തിടുക്കം കൂട്ടിയ ഉദ്യോഗസ്ഥര്‍ തിരികെ സീറ്റില്‍.
റിസര്‍വേഷന്‍ കൗണ്ടര്‍ സന്ദര്‍ശിച്ച തച്ചങ്കരി, രാത്രി യാത്ര പുറപ്പെടാനിരുന്ന ദീര്‍ഘദൂര ബസുകളില്‍ പരിശോധന നടത്തി. തുടര്‍ന്ന് ജീവനക്കാരുമായി ഹൃസ്വചര്‍ച്ച. 'നമുക്ക് ഒത്തുപിടിച്ച് എല്ലാം ഒന്നു ശരിയാക്കാം അല്ലേ' എന്ന ചോദ്യത്തോടെയായിരുന്നു ഒടുവില്‍ ടോമിന്‍ തച്ചങ്കരി മടങ്ങിയത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates