കൊച്ചി: ഹൈക്കോടതിയുടെ പ്രവര്‍ത്തനങ്ങളെയും ചീഫ് ജസ്റ്റിസ് ആന്റണി ഡൊമിനിക്കിനെയും വിമര്‍ശിച്ച റിട്ട. ജസ്റ്റിസ് കെമാല്‍ പാഷയ്ക്ക് മുതിര്‍ന്ന ഹൈക്കോടതി ജഡ്ജിയുടെ വിമര്‍ശനം. കേരള ഹൈക്കോടതിയുടെ പേരു കളയുന്നത് അല്‍പ്പന്മാരായ ജഡ്ജിമാരാണെന്ന്, കെമാല്‍ പാഷയുടെ പേരു പരാമര്‍ശിക്കാതെ, ചീഫ് ജസ്റ്റിസ് കൂടി പങ്കെടുത്ത ചടങ്ങില്‍ ജസ്റ്റിസ് പിഎന്‍ രവീന്ദ്രന്‍ പറഞ്ഞു.

ഹൈക്കോടതിയില്‍ കഴിഞ്ഞ ദിവസങ്ങളിലുണ്ടായ സംഭവങ്ങള്‍ ദുഃഖകരമാണെന്ന് ജസ്റ്റിസ് പിഎന്‍ രവീന്ദ്രന്‍ പറഞ്ഞു. കോടതിയുടെ വിലയിടിച്ചു കാണിക്കാന്‍ ശ്രമിച്ചാല്‍ അവജ്ഞയോടെ തള്ളിക്കളയണം. തന്നെ താനാക്കിയ കോടതിയോട് താന്‍ അങ്ങനെ പെരുമാറില്ല. അല്‍പ്പന്മാരുടെ അവഹേളനങ്ങളെ അവജ്ഞയോടെ തള്ളിക്കളയുകയാണെന്നും ജസ്റ്റിസ് രവീന്ദ്രന്‍ പറഞ്ഞു. 

അല്‍പ്പന്മാര്‍ അവഹേളിക്കാന്‍ ശ്രമിച്ചാല്‍ തടയുക തന്നെ വേണം. അത്തരക്കാര്‍ക്കെതിരെ പറയാനുള്ളതു പറയും. തന്റെയീ സ്വഭാവം തിങ്കളാഴ്ചത്തെ വിടവാങ്ങല്‍ പ്രസംഗത്തില്‍ കാണുമെന്ന് ജസ്റ്റിസ് രവീന്ദ്രന്‍ വ്യക്തമാക്കി.

മനസ്സാക്ഷിക്കു ശരിയെന്നു തോന്നുന്ന കാര്യങ്ങള്‍ മാത്രമേ താന്‍ ചെയ്തിട്ടുള്ളൂവെന്ന് ചീഫ് ജസ്റ്റിസ് ആന്റണി ഡൊമിനിക് പറഞ്ഞു.