കൊച്ചി: നടി ആക്രമിക്കപ്പെട്ട കേസില്‍ അറസ്റ്റിലായ നടന്‍ ദിലീപിന്റെ ജാമ്യഹര്‍ജി അങ്കമാലി കോടതി തള്ളി. ഇതു രണ്ടാം തവണയാണ് അങ്കമാലി മജിസ്‌ട്രേറ്റ് കോടതി ദിലീപിന്റെ ജാമ്യാപേക്ഷ തള്ളുന്നത്. നേരത്തെ രണ്ടു തവണ ഹൈക്കോടതിയും ജാമ്യാപേക്ഷ നിരസിച്ചിരുന്നു.

ജാമ്യാപേക്ഷയില്‍ ശനിയാഴ്ച കോടതി രണ്ടു മണിക്കൂറിലേറെ നേരം കോടതി വാദം കേട്ടിരുന്നു. അടച്ചിട്ട മുറിയിലായിരുന്നു വാദം. ഈ ഘട്ടത്തില്‍ ജാമ്യം നല്‍കുന്നത് അന്വേഷണത്തെ ബാധിക്കുമെന്ന പ്രോസിക്യൂഷന്‍ വാദം അംഗീകരിച്ചാണ് കോടതി ഹര്‍ജി തള്ളിയത്.

നഗ്‌നദൃശ്യങ്ങള്‍ പകര്‍ത്താന്‍ ആവശ്യപ്പെട്ടു എന്ന കേസു മാത്രമാണ് തനിക്കെതിരെ നിലനില്‍ക്കുകയെന്നും കൂട്ടബലാത്സംഗം ഉള്‍പ്പെടെയുള്ള മറ്റു കുറ്റങ്ങള്‍ നിലനില്‍ക്കില്ലെന്നുമാണ് പുതിയ ജാമ്യാപേക്ഷയില്‍ ദിലീപ് ചൂണ്ടിക്കാട്ടിയത്. രണ്ടു മാസമായി താന്‍ റിമാന്‍ഡിലാണെന്നും അന്വേഷണ സംഘവുമായി സഹകരിക്കുന്നുണ്ടെന്നും അതിനാല്‍ ജാമ്യം നല്‍കണമെന്നുമായിരുന്നു ആവശ്യം. എന്നാല്‍ പ്രോസിക്യൂഷന്‍ ഇതിനെ എതിര്‍ത്തു. നടിയെ ആക്രമിക്കാന്‍ ദിലീപ് വ്യക്തമായ നിര്‍ദേശം നല്‍കിയിരുന്നെന്നും നഗ്‌ന ദൃശ്യങ്ങള്‍ പകര്‍ത്താന്‍ മാത്രമായിരുന്നില്ല ക്വട്ടേഷനെന്നും പ്രോസിക്യൂഷന്‍ കോടതിയില്‍ വാദിച്ചു.