തിരുവനന്തപുരം: വനിതാ ഐപിഎസ് ട്രെയിനിയെ ആക്രമിച്ച് മാലപൊട്ടിക്കാന്‍ ശ്രമിച്ച കേസിലെ പ്രതി പിടിയില്‍. വിഴിഞ്ഞം വേങ്ങറ സ്വദേശി സലീമാണ് പിടിയിലായത്. സിസി ടിവി ദൃശ്യങ്ങള്‍ കേന്ദ്രീകരിച്ച് നടത്തിയ അന്വേഷണത്തിലാണ് പ്രതി പിടിയിലായത്. ശനിയാഴ്ച രാവിലെയാണ് ബൈക്കില്‍ വന്നയാള്‍ തിരുവല്ലം പൊലീസ് സ്‌റ്റേഷന്‍ എസ്എച്ച്ഒയുടെ ചുമതലയുള്ള ഐശ്വര്യ പ്രശാന്ത് ഡോംഗ്രെയുടെ മാല പൊട്ടിക്കാന്‍ ശ്രമിച്ചത്.

ക്യാമറാ ദൃശ്യത്തില്‍ കറുത്ത ടീ ഷര്‍ട്ടും പാന്റ്‌സുമാണ് ഇയാളുടെ വേഷം. കോവളം ബൈപാസിലെ സര്‍വീസ് റോഡില്‍ പാച്ചല്ലൂര്‍ കൊല്ലന്തറയ്ക്കു സമീപമായിരുന്നു സംഭവം. തിരുവല്ലം ഭാഗത്തു നിന്നു നടന്നു വന്ന എസ്എച്ച്ഒയുടെ പിന്നാലെ ബൈക്കിലെത്തിയാണു മാല പൊട്ടിച്ചെടുക്കാന്‍ ശ്രമിച്ചത്.