ന്യൂഡെല്‍ഹി: ഉപഭോക്താക്കള്‍ക്ക് മികച്ച സേവനവുമൊരുക്കി ബിഎസ്എന്‍എല്‍. ദിവസവും 4ജിബി ഡാറ്റ ഉപയോഗിക്കുന്നതുള്‍പ്പടെ 90 ദിവസത്തേക്ക് 444 രൂപയാണ് പുതിയ ഓഫര്‍.

ബിഎസ്എന്‍എല്‍ ചൗക്ക 444 എന്നാണ് പുതിയ ഓഫറിന്റെ പേര്. പ്രീപെയ്ഡ് ഉപഭോക്താക്കള്‍ക്ക് മാത്രമായാണ് ഓഫര്‍. ഇത്ര ചുരുങ്ങിയ വിലയ്ക്ക് ഇത്രകാലം ഉപയോഗിക്കാവുന്ന ഓഫര്‍ ആദ്യമായി അവതരിപ്പിക്കുന്നതും ബിഎസ്എന്‍എല്‍ ആണ്. 

എസ്ടിവി 333രൂപ പ്ലാന്‍ വിജയകരമായതിന് പിന്നാലെയാണ് പുതിയ ഓഫര്‍.ഇന്ത്യന്‍  ടെലികോം വ്യവസായത്തിന്റെ നിലവിലെ പ്രവണത കണക്കിലെടുത്താണ് ബിഎസ്എന്‍എല്‍ എല്ലാ ഉപഭോക്താക്കള്‍ക്കും മികച്ച ഓഫര്‍ നല്‍കുന്നതെന്ന് ബിഎസ്എന്‍എല്‍ ബോര്‍ഡ് ഡയറക്ടര്‍ ആര്‍ കെ മിത്തല്‍ അഭിപ്രായപ്പെട്ടു.

ടെലികോം മേഖലയില്‍ റിലയന്‍സ് ജിയോയാണ് മാറ്റത്തിന് തുടക്കം കുറിച്ചത്. ഇതിന് പിന്നാലെയാണ് മറ്റ് കമ്പനികള്‍ ഉപഭോക്താക്കള്‍ക്ക് വന്‍ ഓഫറുകളുമായി രംഗത്തെത്തിയത്.