കൊച്ചി: വളരെ നിസ്വാര്‍ത്ഥനായ വ്യക്തിയാണ് മുഖ്യമന്ത്രി പിണറായി വിജയനെന്ന് വ്യവസായി ഗോകുലം ഗോപാലന്‍. പാര്‍ട്ടിക്ക് വേണ്ടി അദ്ദേഹം എന്തും ചെയ്യുമെന്നും വ്യക്തിപരമായി ഒന്നും ആഗ്രഹിക്കുന്നയാളല്ലെന്നും അദ്ദേഹം പറഞ്ഞു.

ഇപ്പോള്‍ കുറച്ചു മൂകതയുണ്ടെങ്കിലും പണ്ട് പിണറായി വിജയന്‍ എല്ലാവരോടും വളരെ ഫ്രണ്ട്‌ലിയായിരുന്നു. തലശ്ശേരി ബ്രണ്ണന്‍ കോളേജില്‍ പിണറായി വിജയന്റെ ജൂനിയറായി പഠിച്ച കാലത്തെ കുറിച്ചും സമകാലിക ജീവിതത്തെ കുറിച്ചും ഗോകുലം ഗോപാലന്‍ തുറന്ന് പറഞ്ഞു. കൗമുദി ചാനലിന് നല്‍കിയ അഭിമുഖത്തിലായിരുന്നു ഗോകുലം ഗോപാലന്റെ പ്രതികരണം.

പിണറായി വിജയന്‍ അന്നേ നല്ല പാര്‍ട്ടി പ്രവര്‍ത്തകനായിരുന്നു. അദ്ദേഹം ഒരു നേതാവാകുമെന്ന് അന്നേ മനസ്സില്‍ തോന്നിയിരുന്നു. പിണറായി വിജയനോട് താന്‍ പറഞ്ഞ ഒരു കാര്യമുണ്ട്, ആത്മീയമായിട്ട് തന്റെ ആചാര്യന്‍ ചെങ്കോട്ടുകോണം സ്വാമിയാണെങ്കില്‍ രാഷ്ട്രീയത്തില്‍ അത് നിങ്ങളാണെന്ന് ഗോകുലം ഗോപാലന്‍ പറഞ്ഞു.

വളരെ നിസ്വാര്‍ത്ഥനായ വ്യക്തിയാണ് മുഖ്യമന്ത്രി പിണറായി വിജയന്‍. പാര്‍ട്ടിക്ക് വേണ്ടി അദ്ദേഹം എന്തും ചെയ്യും. വ്യക്തിപരമായി ഒന്നും ആഗ്രഹിക്കുന്നയാളല്ല. പണ്ടേ അത് അങ്ങനെ ആയിരുന്നു. ഇന്നും പാര്‍ട്ടി മാത്രമേ അദ്ദേഹത്തിനുള്ളുവെന്നും ഗോകുലം ഗോപാലന്‍ പറഞ്ഞു