ആലപ്പുഴ: ബീഫ് ഫ്രൈയ്ക്കു പകരം കറി നൽകിയെന്ന് പറഞ്ഞ് ഹോട്ടൽ ജീവനക്കാരന്റെ തല അടിച്ചു തകർത്തു. ചേർത്തല എസ്എൽ പുരത്ത് ഹോട്ടൽ ഊട്ടുപുരയിലെ ജീവനക്കാരൻ പൊള്ളേത്തൈ സ്വദേശി ഭാസ്കരനാണ് (60) ഗുരുതരമായി പരുക്കേറ്റത്. മദ്യപിച്ചെത്തിയ യുവാക്കളാണ് ആക്രമണത്തിന് പിന്നിൽ. 

ഇന്നലെ വൈകീട്ട് അഞ്ചോടെയായിരുന്നു സംഭവം. മൂന്ന് യുവാക്കളാണ് മദ്യ ലഹരിയിൽ ഭാസ്കരനെ അക്രമിച്ചത്. കഴിഞ്ഞ ആഴ്ച ബീഫ് ഫ്രൈ ചോദിച്ചപ്പോൾ ബീഫ് കറി കൊടുത്തെന്ന് ആരോപിച്ചായിരുന്നു ആക്രമണം. 

ഹോട്ടലിന്റെ അടുക്കളയിൽ കയറിയാണ് ഭാസ്കരനെ ആക്രമിച്ചത്. തലയുടെ പിൻ ഭാഗത്ത് ആഴത്തിൽ മുറിവേറ്റ ഭാസ്കരന് ആലപ്പുഴ മെഡിക്കൽ കോള് ആശുപത്രിയിൽ ഇന്നു ശസ്ത്രക്രിയ നടത്തും. ഹോട്ടലിലെ സിസി ടിവി ദൃശ്യങ്ങളിൽ പ്രതികളെ കണ്ടെത്തിയിട്ടുണ്ട്. മാരാരിക്കുളം പൊലീസ് കേസ് എടുത്തു.