കൊച്ചി : നടിയെ ആക്രമിച്ച കേസില് നടി മഞ്ജു വാര്യരെ കോടതി ഈയാഴ്ച വിസ്തരിക്കും. സിബിഐ കോടതിയില് ഇന്നും നാളെയും വിസ്താരം ഇല്ലാത്തതിനാല് ബുധനാഴ്ച മാത്രമാകും വിസ്താരം പുനഃരാരംഭിക്കുക. അന്ന് നടിയെ ആക്രമിച്ച സംഭവം പൊലീസിനെ അറിയിച്ച പി ടി തോമസ് എംഎല്എയെയാകും വിസ്തരിക്കുക.
നടിയെ ആക്രമിച്ച് പകര്ത്തിയ ദൃശ്യങ്ങളുടെ ആധികാരികത സംബന്ധിച്ച് ചണ്ഡീഗഡിലെ ഫൊറന്സിക് ലാബില് നിന്നുള്ള ഫൊറന്സിക് പരിശോധനഫലം പ്രതിയായ നടന് ദിലീപിന് ലഭിച്ചിട്ടുണ്ട്. ഇരയും കേസിലെ ഒന്നാം സാക്ഷിയുമായ നടിയെ ഇതിന്റെ അടിസ്ഥാനത്തിലാകും ക്രോസ് വിസ്താരം നടത്തുക.
മഞ്ജുവാര്യരുടെ വിസ്താരത്തിന് ശേഷം നടിയുടെ ക്രോസ് വിസ്താരം നടത്തിയാല് മതിയെന്നാണ് ദിലീപിന്റെ അഭിഭാഷകരുടെ ആലോചന. മഞ്ജുവിന്റെ മൊഴി കേസില് നിര്ണായകമാകുമെന്നാണ് പ്രസിക്യൂഷനും കണക്കുകൂട്ടുന്നത്. സംഭവം നടന്ന ഉടന് ഇതൊരു ക്രിമിനല് ഗൂഡാലോചനയാണെന്ന് മഞ്ജു കൊച്ചിയില് നടന്ന ചലച്ചിത്രപ്രവര്ത്തകരുടെ പ്രതിഷേധയോഗത്തില് ആരോപിച്ചിരുന്നു.
ദിലീപും മുന്ഭാര്യ മഞ്ജുവും വേര്പിരിയാന് കാരണം ആക്രമിക്കപ്പെട്ട യുവനടിയുടെ ഇടപെടലാണെന്നും, അതില് ദിലീപിന് തന്നോട് പകയുണ്ടായിരുന്നുവെന്നും നടി മൊഴി നല്കിയതായാണ് സൂചന. ഇത് മഞ്ജുവും ശരിവെച്ചാല് ദിലീപ് പ്രതിരോധത്തിലാകും. ഗൂഢാലോചനയ്ക്കും കുറ്റകൃത്യത്തിനും കാരണമായ പ്രേരണ സംശയാതീതമായി തെളിയിക്കപ്പെടും.
ഈ സാഹചര്യത്തില് മഞ്ജുവിന്റെ മൊഴി കേസില് നിര്ണായകമാണ്. മഞ്ജുവിനെ പ്രോസിക്യൂഷന് പ്രധാന സാക്ഷിയാക്കിയതും ഇക്കാരണത്താലാണ്. ക്രിമിനല് നടപടിച്ചട്ടം വകുപ്പ് 164 പ്രകാരം പൊലീസ് നേരത്തെ മഞ്ജുവിന്റെ രഹസ്യമൊഴി എടുത്തിരുന്നു. ഈ മൊഴി ദിലീപിന് എതിരാണെന്നാണ് റിപ്പോര്ട്ട്. കോടതിയിലും ഈ മൊഴി ആവര്ത്തിക്കുമോയെന്നാണ് ഇരുവിഭാഗവും ഉറ്റുനോക്കുന്നത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates