തിരുവനന്തപുരം: മുഖ്യമന്ത്രിയുടെ ദുരിതാശ്വാസനിധിയുടെ അക്കൗണ്ട് നമ്പറിൽ കൃത്രിമം കാണിച്ച് പണം തട്ടിയ കേസിൽ തമിഴ്നാട് സ്വ​ദേശി അറസ്റ്റിൽ. തമിഴ്‌നാട് തിരുച്ചിറപ്പള്ളി സ്വ​​ദേശി തോട്ടിയാമ്പട്ടിയിൽ പളനിയപ്പൻ മകൻ വിജയകുമാറാണ് (38) ഷാഡോ പൊലീസിന്റെ പിടിയിലായത്. ദുരിതാശ്വാസനിധിയുടെ അക്കൗണ്ട് നമ്പർ ഉൾപ്പെടെ സോഷ്യൽ മീഡിയയിൽ വന്ന മെസേജ് എഡി​റ്റ് ചെയ്‌ത് സ്വന്തം അക്കൗണ്ട് നമ്പർ ചേർത്ത് പ്രചരിപ്പിച്ചാണ് ഇയാൾ തട്ടിപ്പ് നടത്തിയത്. 

സി​റ്റി പൊലീസ് കമ്മിഷണർക്ക് ലഭിച്ച രഹസ്യ വിവരത്തിന്റെ അടിസ്ഥാനത്തിൽ സൈബർ ഡോം അന്വേഷണം നടത്തി ഇയാളുടെ തിരുച്ചിറപ്പള്ളിയിലെ ബാങ്കിലെ അക്കൗണ്ട് മരവിപ്പിച്ചു. ഷാഡോ പൊലീസ് തമിഴ്‌നാട് കേന്ദ്രീകരിച്ചു നടത്തിയ അന്വേഷണത്തിൽ തിരുച്ചിറപ്പള്ളിയിലെ ബന്ധുവീട്ടിൽ നിന്നാണ് വിജയകുമാറിനെ അറസ്റ്റ് ചെയ്തത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. സി​റ്റിപൊലീസ് കമ്മിഷണർ പി. പ്രകാശാണ് അന്വേഷണത്തിനും അറസ്​റ്റിനും നേതൃത്വം നൽകിയത്.