കൊച്ചി: ത​ദ്ദേ​ശ തെ​ര​ഞ്ഞെ​ടു​പ്പിന്റെ ര​ണ്ടാം​ഘ​ട്ട​ വോട്ടെടുപ്പിൽ മികച്ച പോളിങ്. ശരാശരി 76 ശതമാനം പിന്നിട്ടു. ആദ്യ ഘട്ടത്തെ പിന്തള്ളിയാണ്​ രണ്ടാം ഘട്ടത്തിലെ പോളിങ്​. എട്ടിന് നടന്ന ഒന്നാംഘട്ടത്തിൽ 73.12 ശതമാനമായിരുന്നു പോളിങ്. വയനാട് ജില്ലയിലാണ് കൂടുതൽ പോളിങ്.

വയനാട്ടിൽ 79 ശതമാനമാണ് പോളിങ്. കോട്ടയം 77.1, എറണാകുളം 78, തൃശൂർ 75.7, പാലക്കാട് 75 എന്നിങ്ങനെയാണ് ലഭ്യമായ വിവരം അനുസരിച്ചുള്ള പോളിങ്

വീഡിയോ: (ടിപി സൂരജ്‌)

ഇ​ന്ന്​ അഞ്ച് ജി​ല്ല​ക​ളി​ലെ 98,57,208 വോ​ട്ട​ർ​മാരാണ് വി​ധി​യെ​ഴു​തിയത്. രാവിലെമുതൽ പോളിങ് ബൂത്തിനുമുമ്പിൽ നീണ്ട നിരയാണ് ഉണ്ടായത്. 451 ത​ദ്ദേ​ശ​സ്ഥാ​പ​ന​ങ്ങ​ളി​ലെ 8116 വാ​ർ​ഡു​ക​ളി​ലേ​ക്കാ​ണ് വോട്ടെ​ടു​പ്പ്. 47,28,489 പു​രു​ഷ​ന്മാ​രും 51,28,361 സ്​​ത്രീ​ക​ളും 93 ട്രാ​ൻ​സ്​​ജെ​ൻ​ഡേ​ഴ്സും 265 പ്ര​വാ​സി ഭാ​ര​തീ​യ​രുമാണ് രണ്ടാംഘട്ടത്തിലെ വോട്ടർമാർ. ഇ​തി​ൽ 57,895 പേ​ർ ക​ന്നി വോ​ട്ട​ർ​മാ​രാ​ണ്.