മലപ്പുറം : സംസ്ഥാനത്ത് ഇന്നും കോവിഡ് മരണം. മലപ്പുറം തെയ്യാല സ്വദേശി ഗണേശന്‍ ആണ് മരിച്ചത്. 48 വയസ്സായിരുന്നു. മഞ്ചേരി മെഡിക്കല്‍ കോളജില്‍ ചികില്‍സയില്‍ ഇരിക്കെയായിരുന്നു മരണം.

കോവിഡ്‌ കുതിച്ചുയരുന്ന സാഹചര്യത്തിൽ തിരുവനന്തപുരം, കാസർകോട്‌, മലപ്പുറം, പാലക്കാട്‌, ആലപ്പുഴ, എറണാകുളം, കോട്ടയം ജില്ലകളിൽ അതീവ ജാഗ്രത പാലിക്കണമെന്ന് ആരോ​ഗ്യവകുപ്പ് നിർദേശിച്ചിട്ടുണ്ട്. മലപ്പുറം (12.5), കാസർകോട് (10.1)‌, തിരുവനന്തപുരം (8.9), എറണാകുളം (6.7) ജില്ലകളിലാണ്‌ സംസ്ഥാനത്തെ ഏറ്റവും ഉയർന്ന രോഗസ്ഥിരീകരണ നിരക്ക്‌. 

ഏറ്റവും വേഗത്തിൽ രോഗികളുടെ എണ്ണം കൂടുന്നതും മലപ്പുറത്താണ്‌. ഇരട്ടിയാകാൻ എടുക്കുന്നത്‌ 12 ദിവസംമാത്രം. പാലക്കാട്ട്‌ 15 ദിവസംകൊണ്ട്‌ രോഗികളുടെ എണ്ണം ഇരട്ടിയാകുന്നു. തിരുവനന്തപുരത്തും കോഴിക്കോട്ടും 16 ദിവസവും എടുക്കുന്നു. എല്ലാ ജില്ലയിലും ക്ലസ്റ്റർ നിരീക്ഷണം വ്യാപകമാക്കണം. സ്വകാര്യമേഖലയെക്കൂടി പങ്കെടുപ്പിച്ച്‌ പരിശോധന വ്യാപകമാക്കണമെന്നും റിപ്പോർട്ടിൽ പറയുന്നു.