കൊച്ചി: സുപ്രിം കോടതി വിധി പാലിക്കാന്‍ എല്ലാ ഭരണഘടനാ സ്ഥാപനങ്ങള്‍ക്കും ബാധ്യതയുണ്ടെന്ന് ഹൈക്കോടതി. ശബരിമലയില്‍ മതിയായ സൗകര്യങ്ങള്‍ ഒരുക്കാതെ യുവതികളെ പ്രവേശിപ്പിക്കരുതെന്ന ഹര്‍ജി തള്ളിക്കൊണ്ടാണ് ഹൈക്കോടതിയുടെ പരാമര്‍ശം.

മതിയായ സൗകര്യങ്ങള്‍ ഒരുക്കാതെ ശബരിമലയില്‍ യുവതികളെ പ്രവേശിപ്പിക്കരുതെന്ന് ആവശ്യപ്പെട്ട് പൊതുപ്രവര്‍ത്തകനായ പിഡി ജോസഫാണ് ഹൈക്കോടതിയെ സമീപിച്ചത്. സൗകര്യങ്ങള്‍ ഒരുക്കാതെ തന്നെ പൊലീസ് സുരക്ഷയില്‍ യുവതികളെ കൊണ്ടുപോവാനുള്ള ശ്രമം ഹര്‍ജിക്കാരന്‍ ചൂണ്ടിക്കാട്ടി. എന്നാല്‍ സുപ്രിം കോടതി വിധി പാലിക്കാന്‍ എല്ലാ ഭരണഘടനാ സ്ഥാപനങ്ങള്‍ക്കും ബാധ്യതയുണ്ടെന്നും വിധി അനുസരിച്ച് യുവതികള്‍ക്കു സുരക്ഷ  ഒരുക്കുകയാണ് പൊലീസ് ചെയ്തതെന്നും ചീഫ് ജസ്റ്റിസ് ഋഷികേശ് റോയ് അധ്യക്ഷനായ ബെഞ്ച് പ്രതികരിച്ചു.

സൗകര്യമൊരുക്കാതെ യുവതി പ്രവേശനം അനുവദിക്കരുതെന്ന ഹര്‍ജി ഈ ഘട്ടത്തില്‍ ഹൈക്കോടതിക്കു പരിഗണിക്കാനാവില്ലെന്ന് ബെഞ്ച് ചൂണ്ടിക്കാട്ടി. ഹര്‍ജിക്കാരന് ഇതേ ആവശ്യവുമായി സുപ്രിം കോടതിയെ സമീപിക്കാമെന്നും കോടതി പറഞ്ഞു.