തിരുവനന്തപുരം: ഡിജിപി സെന്‍കുമാര്‍ സ്ഥലം മാറ്റ ഉത്തരവുകള്‍ സര്‍ക്കാര്‍ മരവിപ്പിച്ചു. രണ്ട് ജൂനിയര്‍ സുപ്രണ്ടുമാരുടെ സ്ഥലംമാറ്റമാണ് സര്‍ക്കാര്‍ മരവിപ്പിച്ചത്. ആദ്യം ഇവരെ പോലീസ് ആസ്ഥാനത്തു നിന്നും മാറ്റുകയും പിന്നീട് വീണ്ടും ഇവിടെക്ക് തന്നെ മാറ്റുകയും ചെയ്തതോടെ സര്‍ക്കാര്‍ ഉത്തരവിടുകയായിരുന്നു.

കഴിഞ്ഞ ദിവസം പോലീസ് മേധാവിക്ക് വേണ്ടി പോലീസ് ആസ്ഥാനത്തുള്ള എഡിജിപി മുതല്‍ എഐജിമാര്‍ വരെയുള്ളവര്‍ ഉത്തരവിറക്കേണ്ടെന്ന് സെന്‍കുമാര്‍ നിര്‍ദേശം നല്‍കിയിരുന്നു. സുപ്രീം കോടതി വിധിയിലൂടെ ഡിജിപിയായ സെന്‍കുമാര്‍ ഇത്തരം നടപടികള്‍ എടുക്കുമ്പോള്‍ സര്‍ക്കാരുമായി ആലോചിക്കണമെന്ന സൂചനയാണ് ഇതിലൂടെ നല്‍കുന്നതെന്നാണ് റിപ്പോര്‍ട്ടുകള്‍.

ടി ബ്രാന്‍ഞ്ച് മേധാവി കുമാരി ബീന അടക്കം നാല് ജൂനിയര്‍ സുപ്രണ്ടുമാരെയാണ് സ്ഥലം മാറ്റിക്കൊണ്ട് സെന്‍കുമാര്‍ ഉത്തരവിട്ടത്.