കൊച്ചി: സ്വര്‍ണക്കടത്ത് കേസുമായി ബന്ധപ്പെട്ട് രണ്ട് പേരെ കൂടി എന്‍ഐഎ അറസ്റ്റ് ചെയ്തു. കെടി റമീസിന്റെ സഹായികളായ മലപ്പുറം സ്വദേശികള്‍ ഷറഫൂദ്ദീന്‍, ഷഫീക്ക് എന്നിവരാണ് അറസ്റ്റിലായത്. ഇവരെ ഇന്ന് എന്‍ഐഎ കോടതിയില്‍ ഹാജരാക്കും.

ഷറഫുദ്ദീനും ഷഫീക്കുമാണ് തിരുവനന്തപുരത്തെത്തി സ്വര്‍ണം ശേഖരിച്ച് നിക്ഷേപകര്‍ക്ക് എത്തിച്ചതെന്നാണ് സൂചന. സ്വര്‍ണം വാങ്ങുന്നതിനായി പണം മുടക്കിയത് മലപ്പുറം കോഴിക്കോട് സ്വദേശികളാണെന്നും അവരിലേക്കുള്ള ഇടനിലക്കാരായി പ്രവര്‍ത്തിച്ചത് റമീസിന്റെ സഹായികളായ ഇവരാണെന്ന് എന്‍ഐഎ കണ്ടെത്തിയിട്ടുണ്ട്.

ഇതിനിടെ റമീസിന്റെ കസ്റ്റഡി നീട്ടണമെന്ന് എന്‍ഐഎ കോടതിയില്‍ ആവശ്യപ്പെട്ടു. നാല് ദിവസത്തേക്കാണ് കസ്റ്റഡി നീട്ടണമെന്ന് ആവശ്യപ്പെട്ടത്. എന്നാല്‍ മൂന്ന് ദിവസം കൂടി കോടതി കസ്റ്റഡി നീട്ടി നല്‍കി.