തിരുവനന്തപുരം: സർക്കാർ ഭക്ഷ്യസിവിൽ സപ്ലൈസ് വകുപ്പ് വഴി വിതരണം ചെയ്യുന്ന സൗജന്യ ഭക്ഷ്യധാന്യ കിറ്റ് വാങ്ങാൻ സപ്ലൈകോയിൽ ഈ മാസം 10 മുതൽ 15 വരെ സൗകര്യം ഏർപ്പെടുത്തും. കിറ്റ് റേഷൻ കടയിലൂടെ വാങ്ങാൻ സാധിക്കാത്തവർക്കായാണ് ഈ സൗകര്യമെന്ന് ഭക്ഷ്യ പൊതുവിതരണ വകുപ്പ് മന്ത്രി പി തിലോത്തമൻ പറഞ്ഞു. കിറ്റ് വാങ്ങേണ്ടവർ റേഷൻ കാർഡുമായി സപ്ലൈകോ വിപണനശാലകളിൽ എത്തണം. 

കേരളത്തിലെ മുഴുവൻ റേഷൻ കാർഡ് ഉടമകൾക്കും സൗജന്യ ഭക്ഷ്യധാന്യകിറ്റും നൽകുമെന്ന് സർക്കാർ അറിയിച്ചിരുന്നു. ഇതുപ്രകാരം 87,28,806 കിറ്റുകൾ തയാറാക്കി. ഒരു കിറ്റിന് ശരാശരി 974.03 രൂപ വീതം ചെലവായി. കിറ്റ് വിതരണത്തിനു 756 കോടി രൂപയാണ് സർക്കാർ നൽകിയത്. 

അക്ഷയ കേന്ദ്രങ്ങളിലൂടെ ഇലക്ട്രോണിക് റേഷൻ കാർഡ് വിതരണം വൈകാതെ ആരംഭിക്കുമെന്നും മന്ത്രി പറഞ്ഞു. റേഷൻ കാർഡിലെ ഫോൺ നമ്പർ പുതുക്കുന്നതിന് റേഷൻ കടകളിലോ അക്ഷയ കേന്ദ്രങ്ങളിലോ സൗകര്യം ഒരുക്കുമെന്നും അദ്ദേഹം പറഞ്ഞു.