ഡെട്രോയ്റ്റ്: 11 കുഞ്ഞുങ്ങളുടെ മൃതദേഹം ഒളിപ്പിച്ചനിലയില്‍ കെട്ടിടത്തിന്റെ മുകളില്‍ നിന്ന് കണ്ടെത്തി. യുഎസ് നഗരമായ മിഷിഗണിലുള്ള ഡെട്രോയിട്ടിലാണ് ഞെട്ടിപ്പിക്കുന്ന സംഭവമുണ്ടായത്. മുന്‍പ് ഫ്യൂണറല്‍ ഹോമായി പ്രവര്‍ത്തിച്ചിരുന്ന കെട്ടിടത്തിന്റെ മുകളില്‍ നിന്നാണ് കുട്ടികളുടെ മൃതദേഹം കണ്ടെത്തിയത്. അജ്ഞാത സന്ദേശം ലഭിച്ചതിനെത്തുടര്‍ന്ന് നടത്തിയ പരിശോധനയിലാണ് മൃതദേഹം കണ്ടെടുത്തത്. 

ഒരു പെട്ടിക്കുള്ളില്‍ അടച്ച നിലയിലാണ് ഒന്‍പതു കുഞ്ഞുങ്ങളുടെ മൃതദേഹം. ഇത് പൂര്‍ണമായി അഴുകിയ നിലയിലാണ്. മറ്റ് രണ്ട് കുഞ്ഞുങ്ങള്‍ ശവപ്പെട്ടിയിലായിട്ടാണ്. സംഭവത്തില്‍ അന്വേഷണം ആരംഭിച്ചതായി പൊലീസ് പറഞ്ഞു. ഫ്യൂണറല്‍ ഹോമില്‍ കുട്ടികളുടെ മൃതദേഹങ്ങള്‍ ഒളിപ്പിച്ചിട്ടുണ്ടെന്ന് പറഞ്ഞ് ലഭിച്ച അജ്ഞാത സന്ദേശത്തെത്തുടര്‍ന്നാണ് മിഷിഗണ്‍ ഡിപ്പാര്‍ട്ട്‌മെന്റ് ഓഫ് ലൈസന്‍സിങ് ആന്‍ഡ് റെഗുലേറ്ററി അഫയേഴ്‌സ് സംഭവസ്ഥലത്ത് എത്തിയത്. 

കുഞ്ഞുങ്ങളുടെ മാതാപിതാക്കളെ കണ്ടെത്താനുള്ള ശ്രമത്തിലാണ് ഇപ്പോള്‍ അധികൃതര്‍. എത്ര നാള്‍ മുന്‍പാണ് കുഞ്ഞുങ്ങളും മൃതദേഹം ഇവിടെ ഒളിപ്പിച്ചിട്ട് എന്ന കാര്യം വ്യക്തമായിട്ടില്ല. ചില കുട്ടികളില്‍ ചിലത് ചാപിള്ളകളാണെന്നാണ് പ്രാഥമിക നിഗമനം. ആറ് മാസം മുന്‍പാണ് ഫ്യൂണറല്‍ ഹൗസ് അടച്ചു പൂട്ടിയിട്ട്.