ഒട്ടാവ: കാനഡയിൽ അധികാരമേറ്റ മാർക്ക് കാർണി മന്ത്രിസഭയിൽ ഇന്ത്യൻ വംശജരായ രണ്ട് വനിതകളും. ആരോ​ഗ്യവകുപ്പിന്റെ ചുമതല വഹിക്കുന്ന കമൽ ഖേര (36), ശാസ്ത്രം, വ്യവസായം എന്നീ വകുപ്പുകളുടെ ചുമതല ലഭിച്ച അനിത ആനന്ദ് (58) എന്നിവരുൾപ്പെടെ 11 വനിതകളാണ് 24 അം​ഗ മന്ത്രിസഭയിൽ ഇടം നേടിയത്. കാനഡയുടെ പാർലമെന്റിലേക്ക് തെരഞ്ഞെടുക്കപ്പെട്ട ഏറ്റവും പ്രായം കുറഞ്ഞ അം​ഗമായ കമൽ ഖേര ജനിച്ചത് ഡൽഹിയിലാണ്.

പിന്നീട് കുടുംബം കാനഡയിലെത്തി. അവിടെ ടൊറന്റോയിലെ യോർക് യൂണിവേഴ്സിറ്റിയിൽ നിന്ന് ശാസ്ത്ര ബിരുദം നേടിയ ശേഷം സെന്റ് ജോസഫ്സ് ഹെൽത്ത് സെന്ററിലെ ഓങ്കോളജി വിഭാ​ഗത്തിൽ നഴ്സായി പരിശീലനം നേടി. ബ്രാംപ്ടൻ‌ വെസ്റ്റിൽ നിന്ന് ആദ്യമായി എംപിയായി. രാജിവച്ച ജസ്റ്റിൻ ട്രൂഡോയ്ക്ക് പകരക്കാരിയായി പ്രധാനമന്ത്രി സ്ഥാനത്തേക്കുള്ള മത്സരത്തിൽ മുൻപിൽ നിന്നിരുന്ന അനിത ആനന്ദ് പിന്നീട് മത്സരത്തിൽ നിന്ന് പിൻവാങ്ങി.

നോവ സ്കോട്ടിയയിൽ ജനിച്ചു വളർന്ന അവർ 1985 ൽ ഒന്റാറിയോയിലേക്ക് താമസം മാറ്റി. 2019 ൽ ഓക്‌വില്ലയിൽ നിന്ന് ആദ്യമായി എംപിയായി. ട്രൂഡോ മന്ത്രിസഭയിൽ 37 അം​ഗങ്ങളാണുണ്ടായിരുന്നത്. ആദ്യ മന്ത്രിസഭയിലുണ്ടായിരുന്ന മെലാനി ജോളി തന്നെയാണ് പുതിയ മന്ത്രിസഭയിലും വിദേശകാര്യം കൈകാര്യം ചെയ്യുന്നത്.

മാർക്ക് കാർണി കാനഡ പ്രധാനമന്ത്രി, സഭയില്‍ രണ്ട് ഇന്ത്യന്‍ വംശജര്‍, സത്യപ്രതി‍ജ്ഞയ്ക്ക് ട്രൂഡോ എത്തിയില്ല

മുൻ ഉപപ്രധാനമന്ത്രിയും ധനമന്ത്രിയുമായ ക്രിസ്റ്റിയ ഫ്രീലാൻഡിന് പുതിയ മന്ത്രിസഭയിൽ ​ഗതാ​ഗത വകുപ്പ് ലഭിച്ചിട്ടുണ്ട്. ഒക്ടോബർ 20ന് പൊതു തെരഞ്ഞെടുപ്പ് നടത്തുന്നതുവരെയാണ് മാർക്ക് കാർണി മന്ത്രിസഭയുടെ കാലാവധി.