ടെൽ അവീവ്: ദുബായിൽ നിന്ന് ഇസ്രയേലിലേക്ക് പറക്കവേ പ്രധാന പൈലറ്റിനെ കുത്തിപ്പരിക്കേൽപ്പിച്ച് വിമാനം തകർക്കാൻ ശ്രമിച്ച ഫ്ലൈ ദുബായ് സഹപൈലറ്റ് മതതീവ്രവാദ സ്വഭാവം പുലർത്തിയിരുന്ന ആളാണെന്ന് വെളിപ്പെടുത്തൽ. എട്ടുമാസം മുൻപ് മാത്രം ഫ്ലൈ ദുബായിൽ സർവീസിൽ പ്രവേശിച്ച ഒമാൻ സ്വദേശിയായ ഈ സഹപൈലറ്റിനെക്കുറിച്ച് ഞെട്ടിക്കുന്ന വിവരങ്ങളാണ് സഹപ്രവർത്തകൻ ഇസ്രയേലിലെ ചാനൽ 16 ന്യൂസിനോടും ടൈംസ് ഓഫ് ഇസ്രയേലിനോടും വെളിപ്പെടുത്തിയത്.

ഇയാൾ കടുത്ത മതമൗലികവാദിയായിരുന്നുവെന്നും പകൽ സമയങ്ങളിൽ അമിതമായി പ്രാർത്ഥനകളിൽ മുഴുകിയിരുന്ന ഇയാൾ വനിതാ ജീവനക്കാരോട് സംസാരിക്കാനോ അവർക്ക് കൈകൊടുക്കാനോ പോലും തയ്യാറായിരുന്നില്ലെന്നും സഹപൈലറ്റ് വെളിപ്പെടുത്തി. ഒരു വിമാന കമ്പനിയിലെ സാധാരണ അന്തരീക്ഷത്തിന് ചേരാത്ത വിധമായിരുന്നു ഇയാളുടെ പെരുമാറ്റങ്ങളെന്നും മത തീവ്രവാദിയെപ്പോലെയാണ് പെരുമാറിയിരുന്നതെന്നും സഹപ്രവർത്തകൻ വിശേഷിപ്പിച്ചു. ഒമാനുമായി ഇസ്രായേലിന് നയതന്ത്ര ബന്ധമില്ലാതിരുന്നിട്ടും ഇയാളെ ഇസ്രായേലിലേക്കുള്ള വിമാനത്തിൽ ഡ്യൂട്ടിക്ക് നിയോഗിച്ച എയർലൈനിന്റെ തീരുമാനം വിമാനത്തിലുണ്ടായിരുന്ന എല്ലാവരുടെയും ജീവൻ അപകടത്തിലാക്കിയെന്നും സഹപ്രവർത്തകൻ ചൂണ്ടിക്കാട്ടി.

ദുബായിൽ നിന്ന് ടെൽ അവീവിലേക്ക് 174 യാത്രക്കാരുമായി പുറപ്പെട്ട എഫ്ഇസഡ് 1073 (FZ1073) നമ്പർ വിമാനത്തിലാണ് നാടിനെ നടുക്കിയ സംഭവം അരങ്ങേറിയത്. ആകാശത്ത് 34,000 അടി ഉയരത്തിൽ സഞ്ചരിക്കവെ കോക്ക്പിറ്റിനുള്ളിൽ വെച്ച് സഹപൈലറ്റ് വിമാനത്തിന്റെ ക്യാപ്റ്റനായ മുംബൈ സ്വദേശി സ്മിത് മച്ചാറിനെ കത്തികൊണ്ട് കുത്തിപ്പരിക്കേൽപ്പിക്കുകയും കോക്ക്പിറ്റിലെ നിയന്ത്രണ സംവിധാനങ്ങൾ തടസ്സപ്പെടുത്താൻ ശ്രമിക്കുകയുമായിരുന്നു. ഇതോടെ വിമാനം പെട്ടെന്ന് താഴേക്ക് പതിച്ചു. വെറും 29 സെക്കൻഡിനുള്ളിൽ വിമാനം 14,000 അടിയോളമാണ് കുത്തനെ താഴേക്ക് പതിച്ചത്. രണ്ട് മിനിറ്റിനുള്ളിൽ ആകെ 17,000-ത്തിലധികം അടി താഴേക്ക് പതിച്ചു. വിമാനം ഹൈജാക്ക് ചെയ്തതായി സൂചിപ്പിക്കുന്ന '7500' ഉൾപ്പെടെ രണ്ട് എമർജൻസി അപായ സന്ദേശങ്ങൾ അയച്ച ശേഷം, രക്തത്തിൽ കുളിച്ചുകിടന്ന ക്യാപ്റ്റൻ സ്മിത് മച്ചാർ തന്റെ അവസാന ശ്വാസം വരെ പൊരുതി കോക്ക്പിറ്റിന്റെ വാതിൽ തുറന്നുകൊടുക്കുകയായിരുന്നു. നിലവിളിയും വായുമർദ്ദത്തിലെ വ്യതിയാനവും ശ്രദ്ധയിൽപ്പെട്ട യാനിവ് ഹയൂൺ എന്ന യാത്രക്കാരനും ജീവനക്കാരും കോക്ക്പിറ്റിലേക്ക് പ്രവേശിച്ച് അക്രമിയെ പിടിച്ചുമാറ്റുകയും കീഴടക്കുകയുമായിരുന്നു.

സംഭവം വലിയ നയതന്ത്ര-സുരക്ഷാ വിവാദങ്ങൾക്കും വഴിവെച്ചിട്ടുണ്ട്. ഒമാൻ പൗരനായ സഹപൈലറ്റ് ഇസ്രയേലിലേക്ക് വിമാനം പറത്തിയത് വ്യോമയാന കരാറിന്റെ വ്യക്തമായ ലംഘനമാണോ എന്ന് പരിശോധിക്കാൻ ഇസ്രയേൽ ഗതാഗത മന്ത്രി മിരി റെഗെവ് സിവിൽ ഏവിയേഷൻ അതോറിറ്റിക്ക് നിർദ്ദേശം നൽകി. ഇസ്രയേലുമായി ഔദ്യോഗിക നയതന്ത്ര ബന്ധമുള്ള രാജ്യങ്ങളിൽ നിന്നുള്ള പൈലറ്റുമാർക്ക് മാത്രമേ തങ്ങളുടെ വ്യോമാതിർത്തിയിൽ വിമാനം ഇറക്കാൻ അനുമതിയുള്ളൂ എന്നാണ് ഇസ്രയേൽ നിയമം. ഒമാനുമായി ഇസ്രയേലിന് നിലവിൽ നയതന്ത്ര ബന്ധമില്ല. എന്നാൽ അക്രമിയായ പൈലറ്റിന് ഇരട്ട പൗരത്വമുണ്ടായിരുന്നതായും ഇതാണ് ഇയാളെ സർവീസിന് നിയോഗിക്കാൻ കാരണമെന്നും ചില ഇസ്രയേലി മാധ്യമങ്ങൾ റിപ്പോർട്ട് ചെയ്യുന്നുണ്ട്. പിടിയിലായ ഒമാൻ സ്വദേശിയെ ഭീകരാക്രമണ സാധ്യത മുന്നിൽക്കണ്ട് സൗദി അധികൃതർ കസ്റ്റഡിയിലെടുത്ത് ചോദ്യം ചെയ്തുവരികയാണ്.