ജറുസലേം: ഇസ്രയേല്‍ പാര്‍ലമെന്റ് തെരഞ്ഞെടുപ്പിന്റെ വോട്ടെണ്ണല്‍ പൂര്‍ത്തിയായപ്പോള്‍ ആര്‍ക്കും കേവല ഭൂരിപക്ഷമില്ല. പ്രധാനമന്ത്രി ബെഞ്ചമിന്‍ നെതന്യാഹുവിന്റെ നേതൃത്വത്തിലുള്ള സഖ്യം 53 സീറ്റുകള്‍ നേടിയപ്പോള്‍, പ്രതിപക്ഷ സഖ്യത്തിന് ലഭിച്ചത് 48 സീറ്റുകള്‍. അറബ് പാര്‍ട്ടികള്‍ ആകെ 19 സീറ്റുകള്‍ നേടിയതോടെ പുതിയ സര്‍ക്കാര്‍ രൂപീകരണത്തില്‍ അവരുടെ നിലപാട് നിര്‍ണായകമായേക്കും. ഒക്ടോബര്‍ 27നാണ് തെരഞ്ഞെടുപ്പ് നടന്നത്.

120 അംഗ പാര്‍ലമെന്റായ നെസറ്റില്‍ കേവല ഭൂരിപക്ഷത്തിന് 61 സീറ്റുകള്‍ വേണം. എന്നാല്‍, ഒരു രാഷ്ട്രീയ സഖ്യത്തിനും ഈ സംഖ്യയിലെത്താനായിട്ടില്ല. നെതന്യാഹുവിന്റെ ലിക്കുഡ് പാര്‍ട്ടി 27 സീറ്റുകളുമായി ഏറ്റവും വലിയ ഒറ്റക്കക്ഷിയായി. എന്നാല്‍, ഏറ്റവും വലിയ പാര്‍ട്ടിയായതുകൊണ്ടുമാത്രം നെതന്യാഹുവിന് വീണ്ടും പ്രധാനമന്ത്രിയാകാന്‍ കഴിയില്ല. സര്‍ക്കാര്‍ രൂപീകരിക്കാന്‍ ആവശ്യമായ ഭൂരിപക്ഷ പിന്തുണ ഉറപ്പാക്കുകയാണ് അദ്ദേഹത്തിന് മുന്നിലുള്ള പ്രധാന വെല്ലുവിളി. നെതന്യാഹുവിന്റെ വലതുപക്ഷ സഖ്യത്തിന് 53 സീറ്റുകളാണ് ലഭിച്ചത്. ഭൂരിപക്ഷത്തിന് എട്ട് സീറ്റുകള്‍ കൂടി വേണം.

ഇസ്രയേല്‍ മുന്‍ സൈനിക മേധാവി ഗാഡി ഐസന്‍കോട്ടിന്റെ നേതൃത്വത്തിലുള്ള പ്രതിപക്ഷ സഖ്യം 48 സീറ്റുകള്‍ നേടി. ഐസന്‍കോട്ടിന്റെ യാഷര്‍ പാര്‍ട്ടി 21 സീറ്റുകള്‍ നേടി. ഭൂരിപക്ഷത്തിലേക്കെത്താന്‍ പ്രതിപക്ഷത്തിനും കൂടുതല്‍ പിന്തുണ ആവശ്യമാണ്. അറബ് പാര്‍ട്ടികള്‍ നേടിയ 19 സീറ്റുകളാണ് പുതിയ രാഷ്ട്രീയ സമവാക്യത്തില്‍ ഏറെ ശ്രദ്ധേയമാകുന്നത്. ഇവരുടെ പിന്തുണ ലഭിച്ചാല്‍ സര്‍ക്കാര്‍ രൂപീകരണത്തിനുള്ള സാധ്യതകള്‍ മാറിയേക്കാം. എന്നാല്‍, അറബ് പാര്‍ട്ടികളുടെ പിന്തുണ നേടുന്നതില്‍ രാഷ്ട്രീയവും പ്രത്യയശാസ്ത്രപരവുമായ ഭിന്നതകള്‍ വെല്ലുവിളിയാകും.

അറബ് പാര്‍ട്ടികളുമായി സഖ്യമുണ്ടാക്കുന്നതിനെക്കുറിച്ച് പ്രതിപക്ഷത്തിനുള്ളില്‍ തന്നെ അഭിപ്രായവ്യത്യാസങ്ങളുണ്ട്. അറബ് പാര്‍ട്ടികളുമായി നേരിട്ട് സഖ്യമുണ്ടാക്കില്ലെന്ന നിലപാടാണ് ഐസന്‍കോട്ട് നേരത്തെ സ്വീകരിച്ചിരുന്നത്. അതേസമയം, അറബ് പാര്‍ട്ടികളുടെ പിന്തുണയോടെ സര്‍ക്കാര്‍ രൂപീകരിക്കാനുള്ള സാധ്യതകള്‍ പരിഗണിക്കണമെന്ന് ഡെമോക്രാറ്റ്‌സ് നേതാവ് യെയര്‍ ഗോലാന്‍ ഉള്‍പ്പെടെയുള്ളവര്‍ അഭിപ്രായപ്പെട്ടിട്ടുണ്ട്. പ്രതിപക്ഷത്തിന് അറബ് പാര്‍ട്ടികളുടെ പിന്തുണ ഉറപ്പാക്കാനാകുമോ എന്നതും സര്‍ക്കാര്‍ രൂപീകരണത്തിലെ പ്രധാന ചോദ്യമാണ്. മുന്‍ പ്രധാനമന്ത്രി നഫ്താലി ബെന്നറ്റിന്റെ ടുഗെതർ പാര്‍ട്ടിക്ക് 12 സീറ്റുകളാണ് ലഭിച്ചത്.

മറ്റ് പാര്‍ട്ടികളുടെ സീറ്റുനില

• ജോയിന്റ് ലിസ്റ്റ് – 11 സീറ്റുകള്‍

• ഡെമോക്രാറ്റ്സ് – 8 സീറ്റുകള്‍

• റാം - 8 സീറ്റുകള്‍

• യിസ്രയേല്‍ ബെയ്തെനു – 7 സീറ്റുകള്‍

• യുണൈറ്റഡ് തോറാ ജൂദായിസം – 7 സീറ്റുകള്‍

• ഒറ്റ്സ്മ യെഹൂദിത് – 7 സീറ്റുകള്‍

• ഷാസ് – 6 സീറ്റുകള്‍

• റിലീജിയസ് സയണിസം – 6 സീറ്റുകള്‍

തെരഞ്ഞെടുപ്പ് ഫലത്തില്‍ തര്‍ക്കം

വോട്ടെടുപ്പിന് പിന്നാലെ വിദേശ ഇടപെടലും അറബ് വോട്ടര്‍മാരുടെ ഉയര്‍ന്ന പങ്കാളിത്തവും സംബന്ധിച്ച ആരോപണങ്ങളും വിവാദങ്ങള്‍ക്ക് വഴിവെച്ചിട്ടുണ്ട്. അറബ് നേതൃത്വത്തിലുള്ള പാര്‍ട്ടികള്‍ വോട്ടുവാങ്ങലിലൂടെയും നിയമവിരുദ്ധമായ വോട്ടര്‍ സമാഹരണത്തിലൂടെയും നേട്ടമുണ്ടാക്കിയെന്ന ആരോപണമാണ് ലിക്കുഡ് ഉയര്‍ത്തിയത്. തിരഞ്ഞെടുപ്പ് അട്ടിമറിക്കപ്പെട്ടുവെന്ന തരത്തിലുള്ള ആരോപണങ്ങളും പാര്‍ട്ടി ഉന്നയിച്ചു. എന്നാല്‍, ആരോപണങ്ങള്‍ക്ക് തെളിവ് ഹാജരാക്കിയിട്ടില്ലെന്നാണ് റിപ്പോര്‍ട്ടുകള്‍ വ്യക്തമാക്കുന്നത്.

ഇനി എന്ത് സംഭവിക്കും?

തെരഞ്ഞെടുപ്പില്‍ ആര്‍ക്കും വ്യക്തമായ ഭൂരിപക്ഷമില്ലാത്തതിനാല്‍ സര്‍ക്കാര്‍ രൂപീകരണം സങ്കീര്‍ണമാകാനാണ് സാധ്യത. നെതന്യാഹുവിന്റെ സഖ്യത്തിന് എട്ട് സീറ്റുകള്‍ കൂടി ലഭിച്ചാല്‍ ഭൂരിപക്ഷത്തിലെത്താം. മറുവശത്ത്, പ്രതിപക്ഷത്തിന് നിലവിലെ 48 സീറ്റുകളില്‍നിന്ന് 13 സീറ്റുകളുടെ അധിക പിന്തുണ ആവശ്യമാണ്. ചെറുകക്ഷികളില്‍നിന്നോ മറ്റ് രാഷ്ട്രീയ വിഭാഗങ്ങളില്‍നിന്നോ പിന്തുണ ലഭിച്ചാല്‍ നെതന്യാഹുവിന് അധികാരത്തില്‍ തുടരാനുള്ള സാധ്യതയുണ്ട്. ഐസന്‍കോട്ടിന്റെ നേതൃത്വത്തിലുള്ള പ്രതിപക്ഷത്തിന് മറ്റ് കക്ഷികളുടെയും അറബ് പാര്‍ട്ടികളുടെയും പിന്തുണ നേടാനായാല്‍ നെതന്യാഹുവിനെ അധികാരത്തില്‍നിന്ന് മാറ്റാനാകും.

പ്രധാന രാഷ്ട്രീയ കക്ഷികള്‍ തമ്മില്‍ ധാരണയിലെത്തിയാല്‍ ഒന്നിലധികം രാഷ്ട്രീയ വിഭാഗങ്ങളെ ഉള്‍പ്പെടുത്തിയുള്ള വിശാല സഖ്യ സര്‍ക്കാര്‍ രൂപീകരിക്കാനും സൈദ്ധാന്തികമായി സാധിക്കും. എന്നാല്‍, നെതന്യാഹുവിനെ അധികാരത്തില്‍നിന്ന് പുറത്താക്കുകയെന്ന പ്രതിപക്ഷത്തിന്റെ ലക്ഷ്യവും അദ്ദേഹത്തിന്റെ സഖ്യകക്ഷികളുമായുള്ള രാഷ്ട്രീയ ഭിന്നതകളും ഇത്തരമൊരു നീക്കത്തെ സങ്കീര്‍ണമാക്കുന്നു. സര്‍ക്കാര്‍ രൂപീകരണത്തിനായി ഒരു കക്ഷിക്കും ആവശ്യമായ പിന്തുണ ഉറപ്പാക്കാന്‍ കഴിയാതെ വന്നാല്‍ വീണ്ടും തെരഞ്ഞെടുപ്പ് നടത്തേണ്ട സാഹചര്യം ഉണ്ടായേക്കാം.

തെരഞ്ഞെടുപ്പിന്റെ അന്തിമ ഫലം ഔദ്യോഗികമായി സ്ഥിരീകരിക്കുന്നതിനുള്ള നടപടികള്‍ പൂര്‍ത്തിയാകുന്നതോടെ പ്രസിഡന്റ് ഐസക് ഹെര്‍സോഗ് രാഷ്ട്രീയ കക്ഷികളുമായി കൂടിയാലോചിക്കും. തുടര്‍ന്ന് സര്‍ക്കാര്‍ രൂപീകരിക്കാന്‍ ഏറ്റവും കൂടുതല്‍ സാധ്യതയുള്ള നേതാവിനെ അദ്ദേഹം ചുമതലപ്പെടുത്തും. നിലവിലെ സീറ്റുനില അനുസരിച്ച് നെതന്യാഹുവിന്റെ തിരിച്ചുവരവ് ഉറപ്പായിട്ടില്ല. പ്രതിപക്ഷത്തിനും ഒറ്റയ്ക്ക് ഭൂരിപക്ഷം നേടാനായിട്ടില്ല. വരും ദിവസങ്ങളിലെ സഖ്യചര്‍ച്ചകളും ചെറുകക്ഷികളുടെ നിലപാടുകളും ഇസ്രയേലിന്റെ അടുത്ത സര്‍ക്കാര്‍ ആരുടെ നേതൃത്വത്തിലായിരിക്കുമെന്ന് തീരുമാനിക്കുന്നതില്‍ നിര്‍ണായകമാകും.