പാമ്പ് എന്ന് കേള്‍ക്കുമ്പോള്‍ തന്നെ പേടിക്കുന്നവരാണ് ഭൂരിഭാഗം ആളുകളും. പാമ്പിനെ നേരിട്ട് കണ്ടാലോ പറയുകയും വേണ്ട!. ജനക്കൂട്ടത്തിന് നടുവിലേക്ക് കൂറ്റന്‍ പാമ്പ് എത്തിയാലോ?, ജനങ്ങള്‍ പരിഭ്രാന്തരാകാതിരുന്നാലെ അത്ഭുതമുള്ളൂ.അതുതന്നെയാണ് ഫിലിപ്പീന്‍സിലെ ബോഹോളിലുള്ള ടാഗ്ബിലാരന്‍ നഗരത്തിലും സംഭവിച്ചത്. 

ഒക്ടോബര്‍ 12ന് വൈകുന്നേരം ആറരയോടെയാണ് മാര്‍ക്കറ്റിലെ നിരത്തിനു മുകളിലെ കേബിളില്‍ പാമ്പിനെ കണ്ടത്. തിരക്കേറിയ നിരത്തിനു മുകളിലൂടെ പോകുന്ന കേബിളിലൂടെയാണ് കൂറ്റന്‍ പാമ്പ് ഇഴഞ്ഞു നീങ്ങിയത്. പാമ്പിനെ കണ്ടതും പേടിച്ച് ചില ആളുകള്‍ നിലവിളിക്കാന്‍ തുടങ്ങി. മറ്റു ചിലര്‍ അപൂര്‍വ ദൃശ്യം മൊബൈലില്‍ പകര്‍ത്തുന്നുണ്ടായിരുന്നു. കേബിളിലൂടെ ഇഴഞ്ഞു നീങ്ങുന്ന കൂറ്റന്‍ പാമ്പിന്റെ ദൃശ്യമാണ് ഇപ്പോള്‍ സമൂഹമാധ്യമങ്ങളിലൂടെ വ്യാപകമായി പ്രചരിക്കുന്നത്. വൈറല്‍ഹോഗാണ് യൂട്യൂബിലൂടെ ഈ ദൃശ്യം പങ്കുവച്ചത്. 

ഇതിനിടയിലാണ് പാമ്പ് താഴെ പാര്‍ക്ക് ചെയ്തിരിക്കുന്ന ഇരുചക്ര വാഹനങ്ങള്‍ക്കിടയിലേക്ക് വീണത്. ഉടന്‍തന്നെ ചുറ്റുമുണ്ടായിരുന്നവര്‍ അവിടേക്ക് ഓടിച്ചെന്നു. അവിടെയുണ്ടായിരുന്നവര്‍ ഉടന്‍തന്നെ പാമ്പിനെ പിടികൂടി സുരക്ഷിത സ്ഥലത്തേക്ക് തുറന്നുവിടുകയും ചെയ്തു.