വളർത്തുനായയ്ക്ക് ചുവന്ന ഡൈ പൂശി കളർ വരുത്തിയ ടിക്ക് ടോക്കർക്കെതിരെ വിമർശനം. ഡാൻഡിലിയോൺ എന്ന ഗ്രേറ്റ് പിയറനീസ് ഇനത്തിലെ നായ്ക്കുട്ടിക്കാണ് ഉടമ ചുവന്ന കളർ പൂശിയത്. നായ്ക്കുട്ടിയുടെ പേരിലെ ഇൻസ്റ്റഗ്രാം പേജിൽ വിഡിയോകൾ പങ്കുവച്ചതിന് പിന്നാലെയാണ് വിമർശനങ്ങൾ നിറഞ്ഞത്. 

ഡാൻഡിലിയോണിനെ ഇനി കാർ തട്ടില്ലെന്നും, ബ്രൈറ്റ് കളറിന് നന്ദി എന്നുമൊക്കെയാണ് വിഡിയോകൾക്കൊപ്പം യുവതി കുറിച്ചത്. നായ്ക്കുട്ടിയെ ആരു മോഷ്ടിക്കുകയില്ലെന്നും ശരീരത്തിലെ രോമങ്ങള്‍ക്ക് ഇങ്ങനെ ചെയ്യുന്നത് നല്ലതാണെന്നുമെല്ലാം യുവതി നിറമടിക്കാനുള്ള കാരണമായി നിരത്തി. ഇവർ പല ന്യായങ്ങളും പറഞ്ഞെങ്കിലും മൃഗങ്ങൾക്കെതിരെയുള്ള ചൂഷണമാണ് ഇത്തരം പ്രവർത്തികളെന്നാണ് വിഡിയോയിൽ പലരും കുറിച്ച കമന്റ്. 

ഇത്തരം പ്രവർത്തിയും മൃഗസ്‌നേഹവും തമ്മിൽ യാതൊരു ബന്ധവും ഇല്ലെന്നും ഇത് ഉടമയുടെ മാത്രം താത്പര്യമാണെന്നും ചിലർ ചൂണ്ടിക്കാട്ടി. വളർത്തുനായയ്ക്ക് കൂടുതൽ ശ്രദ്ധ കിട്ടാനും വൈറൽ ആകാനുമുള്ള ആഗ്രഹങ്ങളാണ് ഇത്തരം പ്രവർത്തികൾക്ക് പിന്നിലെന്ന് പലരും ചീണ്ടിക്കാട്ടി.