വാഷിങ്ടണ്‍: ചുങ്കപ്പോരില്‍ അപ്രതീക്ഷിത നടപടിയുമായി യുഎസ് പ്രസിഡന്റ് ഡോണള്‍ഡ് ട്രംപ്. ചൈന ഒഴികെയുള്ള രാജ്യങ്ങള്‍ക്ക് ഏര്‍പ്പെടുത്തിയ പകരച്ചുങ്കം ട്രംപ് മരവിപ്പിച്ചു. 90 ദിവസത്തേക്കാണ് അധിക തീരുവ ചുമത്തിയത് മരവിപ്പിച്ചത്. ഈ 90 ദിവസം പകരച്ചുങ്കം 10 ശതമാനം മാത്രമായിരിക്കുമെന്ന് ട്രംപ് വ്യക്തമാക്കി.

അതേസമയം ചൈനയ്ക്കുള്ള ഇറക്കുമതി തീരുവ 125 ശതമാനമായി ഉയര്‍ത്തിയിട്ടുണ്ട്. ഇത് ഉടന്‍ പ്രാബല്യത്തില്‍ വരുമെന്ന് ട്രംപ് സമൂഹമാധ്യമത്തിലൂടെ അറിയിച്ചു. ചൈന ഒഴികെയുള്ള 75 ഓളം രാജ്യങ്ങള്‍ക്ക് അടിസ്ഥാന തീരുവ 10 ശതമാനമായിരിക്കുമെന്ന് യു എസ് പ്രസിഡന്റ് വ്യക്തമാക്കി.

EU Tariff : തിരിച്ചടിച്ച് യൂറോപ്യൻ യൂണിയനും; അമേരിക്കൻ ഉത്പന്നങ്ങൾക്ക് 25 ശതമാനം തീരുവ ചുമത്തി

വ്യാപാര യുദ്ധം കനക്കുന്നതിനിടെ ചൈനയ്ക്ക് ട്രംപ് ബുധനാഴ്ച 104 ശതമാനം തീരുവ ഏര്‍പ്പെടുത്തിയിരുന്നു. ഇതിനു തിരിച്ചടിയായി യു എസ് ഉത്പന്നങ്ങള്‍ക്ക് ചൈനയും തീരുവ വര്‍ധിപ്പിച്ചു. യുഎസില്‍ നിന്ന് ഇറക്കുമതി ചെയ്യുന്ന ഉത്പന്നങ്ങള്‍ക്ക് 34 ശതമാനമായിരുന്ന തീരുവ, 84 ശതമാനമായിട്ടാണ് കൂട്ടിയത്.