ബെയ്ജിങ്: അമ്മയോടുള്ള ഈ നാല് വയസുകാരന്റെ സ്നേ​​ഹം ലോകത്തിന്റെ മുഴുവൻ ശ്രദ്ധ പിടിച്ചുപറ്റുകയാണ്. മക്കളായാൽ ഇങ്ങനെ വേണം എന്ന് ആരും പറയും ഈ വീഡിയോ കാണുമ്പോൾ. ചൈനയിൽ നടന്ന ഒരു അപകടത്തിന്റെ വിഡിയോയാണ് സോഷ്യൽ മീഡിയയിൽ ഹിറ്റായി മാറുന്നത്. 

അമ്മയുടെ കൈയിൽ പിടിച്ച് റോഡ് മുറിച്ച് കടക്കുകയാണ് നാല് വയസു പ്രായം വരുന്ന ഈ ബാലൻ. പെട്ടെന്നാണ് ഒരു കാർ അമ്മയെയും കുട്ടിയേയും ഇടിച്ചിടുന്നത്. അമ്മയും മകനും തൊട്ടടുത്ത് തന്നെ തെറിച്ചു വീണു. നിലവിളിച്ച് കൊണ്ട് ആ നാല് വയസുകാരൻ ആദ്യം ഓടി അമ്മയുടെ അടുത്തെത്തി. അമ്മ പതിയെ എഴുന്നേറ്റ് വരുന്നത് കണ്ട് മകന് ആശ്വാസമായി. 

പിന്നീട് ചാടിയെഴുന്നേറ്റ കുട്ടി, ഇടിച്ചിട്ട കാറിന് ആദ്യം ഒരു ചവിട്ട് വച്ചുകൊടുത്തു. എന്നിട്ട് ഡ്രൈവറോടായി ദേഷ്യം. അറിയാവുന്ന രീതിയിലൊക്കെ ആ ദേഷ്യം അവൻ പ്രകടമാക്കി. ഒടുവിൽ കാറിന്റെ ഡ്രൈവർ പുറത്തിറങ്ങി കുട്ടിയെ ആശ്വസിപ്പിച്ചു. പിന്നീട് മകനെയും അമ്മയെയും അതേ കാറിൽ കയറ്റി കൊണ്ടുപോവുകയും ചെയ്തു. അപകടത്തിൽ ഇവരുവർക്കും കാര്യമായ പരുക്കുകളില്ല.