മനില: ആറുദിവസം പ്രായമായ കുഞ്ഞിനെ ബാഗിലിട്ട് രാജ്യം വിടാന് ശ്രമിച്ച യുവതി പിടിയില്. ഫിലിപ്പീന്സിലെ മനില എയര്പ്പോട്ടില് വച്ചാണ് അമേരിക്കന് സ്വദേശിയായ യുവതി പിടിയിലായത്. സെപ്റ്റംബര് 4നായിരുന്നു സംഭവം.
സംഭവത്തെക്കുറിച്ച് ഫിലിപ്പീന്സ് ഇമിഗ്രേഷന് ബ്യൂറോ വക്താവ് മെല്വിന് മബുലക് പറയുന്നതിങ്ങനെ:''ബുധനാഴ്ച പുലര്ച്ചെ 6.20 നാണ് ഈ സംഭവത്തെക്കുറിച്ചറിയുന്നത്. മനിലയിലെ നിനോയ് അക്വിനെ ഇന്റര്നാഷണല് എയര്പോര്ട്ടില് വച്ചാണ് 43കാരിയായ സ്ത്രീയുടെ ലഗേജിനുള്ളില് നവജാതശിശുവിനെ കണ്ടെത്തിയത്. കേവലം ആറുദിവസം പ്രായമായ കുഞ്ഞിനെയാണ് അവരുടെ ബാഗില് കണ്ടെത്തിയത്.
തന്റെ പാസ്പോര്ട്ട് മാത്രമാണ് യുവതി എയര്പോര്ട്ടില് ഹാജരാക്കിയത്. എയര്പോര്ട്ട് ജീവനക്കാര് നടത്തിയ പരിശോധനയിലാണ് അവരുടെ ബാഗിനുള്ളില് നിന്നും നവജാതശിശുവിനെ കണ്ടെത്തിയത്. കുഞ്ഞിനെ സംബന്ധിച്ച് ഒരു രേഖകളും അവര് എയര്പോര്ട്ട് അധികൃതര്ക്ക് മുന്നില് ഹാജരാക്കിയിരുന്നില്ല. കുഞ്ഞിനെക്കുറിച്ച് എയര്പോര്ട്ട് ജീവനക്കാര് ചോദിക്കുമ്പോള് താന് കുഞ്ഞിന്റെ ബന്ധുവാണെന്ന മറുപടിയാണ് യുവതി നല്കുന്നത്. പക്ഷേ കുഞ്ഞുമായുള്ള ബന്ധം തെളിയിക്കുന്നതിനുള്ള രേഖകളും അവരുടെ പക്കലില്ല''.
ഫിലിപ്പീന്സ് നാഷണല് ബ്യൂറോ ഓഫ് ഇന്വെസ്റ്റിഗേഷന് ആന്റി ഹ്യൂമന് ട്രാഫിക്കിങ് ഡിവിഷന് ഈ സംഭവത്തെക്കുറിച്ച് അന്വേഷിച്ചുകൊണ്ടിരിക്കുകയാണിപ്പോള്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates