ലണ്ടന്‍: നയതന്ത്രപരിപാടികള്‍ക്കിടെ നൃത്തം വെച്ച് വ്യത്യസ്ത പ്രധാനമന്ത്രിയാണ് താന്‍ എന്ന് തെരേസാ മേ ഇതിന് മുന്‍പ് തെളിയിച്ചിട്ടുണ്ട്. വീണ്ടും നൃത്തത്തിന്റെ നയതന്ത്രം പുറത്തെടുത്തിരിക്കുകയാണ് ബ്രിട്ടിഷ് പ്രധാനമന്ത്രി. ഇതിന്റെ വീഡിയോ സോഷ്യല്‍മീഡിയയില്‍ ഇപ്പോള്‍ വൈറലായിരിക്കുകയാണ്.

ബ്രിട്ടിഷ് കണ്‍സര്‍വേറ്റീവ് പാര്‍ട്ടിയുടെ സമ്മേളന വേദിയെ ഇളക്കി മറിച്ചാണ് നൃത്തത്തിന്റെ നയന്ത്ര ചുവടുകളുമായി തെരേസാ മേ എത്തിയത്. ഒരു നേരമ്പോക്ക് എന്ന് പറഞ്ഞ് തളേളണ്ട!, വിഘടിച്ച് നില്‍ക്കുന്ന കണ്‍സര്‍വേറ്റീവ് പാര്‍ട്ടിയെയും വിവാദമായ ബ്രെക്‌സിറ്റ് വിഷയത്തില്‍ രാജ്യത്തെയും യോജിപ്പില്‍ എത്തിക്കുക എന്നതാണ് ഈ നൃത്തത്തിന്റെ നയതന്ത്രം എന്നാണ് റിപ്പോര്‍ട്ടുകള്‍. 

1970കളില്‍ ലോകത്തെ ഇളക്കിമാറിച്ച സ്വീഡിഷ് പോപ്പ് ഗ്രൂപ്പ് ആബയുടെ സംഗീതത്തിനൊപ്പം താളം പിടിച്ചാണ് പ്രധാനമന്ത്രിയുടെ നൃത്തം. ഡാന്‍സിങ് ക്യൂന്‍ എന്ന ഗാനത്തിലെ വരികളുടെ ചുവടുപിടിച്ച് തെരേസാ മേ നൃത്തം വെച്ചപ്പോള്‍ സദസ്സ് ഒന്നടങ്കം എഴുന്നേറ്റ് കരഘോഷം മുഴക്കി.