വാഷിങ്ടണ്‍: ഇന്ത്യയിലെ പൗരത്വ നിയമ ഭേദഗതി രാജ്യാന്തര മനുഷ്യാവകാശ നിയമങ്ങളുടെ ലംഘനമാണെന്ന്, മനുഷ്യാവകാശ സംഘടനയായ ആംനെസ്റ്റി ഇന്റര്‍നാഷണല്‍. മതത്തിന്റെ അടിസ്ഥാനത്തിലുള്ള വിവേചനം നിയമപരമാക്കുന്ന നടപടിയാണിത്. ഇന്ത്യന്‍ ഭരണഘടനയുടെയും വ്യക്തമായ ലംഘനമാണ് ഇതെന്ന് അമേരിക്കന്‍ പാരലമെന്ററി സമിതിയിലെ തെളിവെടുപ്പില്‍ ആംനസ്റ്റി അഭിപ്രായപ്പെട്ടു.

യുഎസ് പ്രതിനിധി സഭയുടെ മനുഷ്യാവകാശങ്ങള്‍ക്കായുള്ള സമിതിയുടെ സിറ്റിങ്ങില്‍ ആംനെസ്റ്റി ഏഷ്യാ പസഫിക് അഡ്വക്കസി മാനേജര്‍ ഫ്രാന്‍സിസ്‌കോ മെന്‍കോസ്‌മെയാണ് സംഘടനയുടെ അഭിപ്രായം അറിയിച്ചത്. ഇന്ത്യന്‍ ഭരണഘടന മുന്നോട്ടുവയ്ക്കുന്ന മൂല്യങ്ങളെ വ്യക്തമായി ലംഘിക്കുന്നതാണ് പൗരത്വ നിയമ ഭേദഗതി. മതത്തിന്റെ പേരിലുള്ള വിവേചനം നിയമപരമാക്കുകയാണ് ഇതിലൂടെ ചെയ്യുന്നത്. രാജ്യാന്തര മനുഷ്യാവകാശങ്ങളെ ഇന്ത്യന്‍ നിയമം ലംഘിക്കുന്നതായി മെന്‍കോസ്‌മെ പറഞ്ഞു.

നേരത്തെ യുഎസ് പാര്‍ലമെന്ററി സമിതികള്‍ പൗരത്വ നിയമ ഭേദഗതിക്കെതിരെ അഭിപ്രായ പ്രകടനം നടത്തിയിരുന്നു. തികച്ചും ഇന്ത്യയുടെ ആഭ്യന്തര കാര്യം എന്നു വ്യക്തമാക്കിയാണ് ഇന്ത്യ ഇതിനോടു പ്രതികരിച്ചത്.