പാരീസ്‌; ഫ്രഞ്ച് പ്രസിഡന്റ് ഇമ്മാനുവല്‍ മക്രോണിന്റെ സാമ്പത്തിക പരിഷ്‌കരണങ്ങള്‍ക്കെതിരേ തൊഴിലാളി യൂണിയനുകള്‍ നടത്തിയ മെയ്ദിന റാലി അക്രമാസക്തമായി. മുഖം മൂടി ധരിച്ചെത്തിയ നൂറു കണക്കിന് വരുന്ന പ്രതിഷേധക്കാര്‍ മെയ് ദിന റാലിയില്‍ കടന്നുകയറി പാരീസില്‍ അക്രമങ്ങള്‍ അഴിച്ചുവിടുകയായിരുന്നു. കടകളുടെ ചില്ലുകള്‍ അടിച്ചുതകര്‍ക്കുകയും വാഹനങ്ങള്‍ കത്തിക്കുകയും പൊലീസിന് നേരെ കല്ലെറിയുകയും ചെയ്തു. 

അക്രമണത്തില്‍ പൊലീസ് ഉദ്യോഗസ്ഥന്‍ ഉള്‍പ്പടെ നാല് പേര്‍ക്ക് പരിക്കേറ്റു. സംഭവത്തില്‍ 200 ല്‍ പ്രതിഷേധക്കാര്‍ അറസ്റ്റിലായതായി പൊലീസ് മേധാവി അറിയിച്ചു. ടിയര്‍ ഗ്യാസും ജല പീരങ്കിയും ഉപയോഗിച്ചാണ് പൊലീസ് പ്രതിഷേധക്കാരെ നേരിട്ടത്. അക്രമണസംഭവങ്ങള്‍ക്ക് നേതൃത്വം നല്‍കിയവര്‍ക്കെതിരേ നടപടിയെടുക്കുമെന്ന് മക്രോണ്‍ ട്വിറ്ററിലൂടെ അറിയിച്ചു. 

തീവ്ര ഇടതു സംഘടനയായ ബ്ലാക് ബ്ലോക്‌സിന്റെ പ്രവര്‍ത്തകരാണ് അക്രമണത്തിന് നേതൃത്വം നല്‍കിയതെന്നാണ് പൊലീസ് പറയുന്നത്. കറുപ്പണിഞ്ഞ് എത്തിയ 1,200 ഓളം പ്രതിഷേധക്കാര്‍ റാലിയിലേക്ക് കടന്നുകയറുകയായിരുന്നെന്ന് പൊലീസ് പറഞ്ഞു. സോവിയറ്റ് കൊടിയും ഗവണ്‍മെന്റ് വിരുദ്ധ ബാനറുകളും ഫാസിസ വരുദ്ധ മുദ്രാവാക്യങ്ങളും വിളിച്ചാണ് പ്രതിഷേധക്കാരെത്തിയത്. എന്നാല്‍ യൂണിയനുകള്‍ സമാധാനപരമായ പ്രതിഷേധങ്ങളാണ് നടത്തിയത്. പ്രധാന മെയ് ദിന റാലിയില്‍ 55,000 പേരാണ് അണിചേര്‍ന്നത്.