ന്യൂയോര്‍ക്ക്: പളളിയില്‍ നിന്നും ഇലക്ട്രോണിക് സാധനങ്ങള്‍ മോഷ്ടിച്ച കളളന്‍ മടങ്ങി പോയത് കുറിപ്പ് എഴുതിവെച്ച ശേഷം. രണ്ടുലക്ഷത്തിലധികം വില വരുന്ന ഇലക്ട്രോണിക് സാധനങ്ങള്‍ മോഷ്ടിച്ച കളളനാണ് തനിക്കായി പ്രാര്‍ത്ഥിക്കണം എന്ന കുറിപ്പും എഴുതിവെച്ചിട്ട് സ്ഥലംവിട്ടത്. അമേരിക്കയിലെ വാട്ടര്‍ബറിയിലാണ് സംഭവം. പള്ളിയില്‍ നിന്നും കള്ളന്‍ മോഷണം നടത്തുന്നതിന്റെയും കുറിപ്പ് എഴുതി വയ്ക്കുന്നതിന്റെയും സിസി ടിവി ദൃശ്യങ്ങള്‍ പൊലീസ് പുറത്തുവിട്ടു. 

സഹോദരങ്ങളെ ക്ഷമിക്കണം, എന്നെ രക്ഷിക്കണം എനിക്കായി പ്രാര്‍ത്ഥിക്കണം എന്നായിരുന്നു മോഷ്ടാവ് കുറിപ്പില്‍ എഴുതിയിരുന്നത്. ഓഡിയോ വീഡിയോ ഇലക്ട്രോണിക് ഉപകരണങ്ങളാണ് മോഷ്ടാവ് കൊണ്ടുപോയത്. ഞായറാഴ്ച അര്‍ദ്ധരാത്രി 1 മണിയോടെയാണ് സംഭവം. സംഭവം നടന്ന് രണ്ട് ദിവസങ്ങള്‍ക്ക് ശേഷമാണ് സിസി ടിവി ദൃശ്യങ്ങള്‍ പുറത്ത് വിട്ടത്.