ഹൂസ്റ്റണ്: 'ഹൗഡി മോദി' പരിപാടിക്ക് ആവേശകരമായ തുടക്കം. പ്രധാനമന്ത്രി നരേന്ദ്ര മോദി ടെക്സസിലെ ഇന്ത്യന് വംശജരായ അമേരിക്കക്കാരോടു സംസാരിക്കുന്ന 'ഹൗഡി മോദി' സംഗമ വേദിയില് നരേന്ദ്ര മോദി ഒമ്പതരയോടെയാണ് എത്തിയത്. നിര്ത്താത്ത കരഘോഷങ്ങളോടെയാണ് സദസ് അദ്ദേഹത്തെ സ്വീകരിച്ചത്. വേദിയില് വച്ച് നഗരത്തിന്റെ താക്കോല് മോദിക്ക് പ്രതീകാത്മകമായി സമ്മാനിച്ച് ഹൂസ്റ്റണ് മേയര് അദ്ദേഹത്തെ സ്വീകരിച്ചു. യുഎസ് പ്രസിഡന്റ് ഡൊണാള്ഡ് ട്രംപ് അല്പ്പ സമയത്തിനകം എത്തും.
നേരത്തെ ഭാരത് മാതാ കി ജയ് വിളിച്ചുകൊണ്ട് മോദിക്ക് സ്വാഗതം ആശംസിച്ച് ഡോലക് കൊട്ടി ആഘോഷമായാണ് ഇന്ത്യന് വംശജര് ചടങ്ങ് നടക്കുന്ന സ്റ്റേഡിയത്തില് എത്തിയത്. നിരവധി സാംസ്കാരിക പരിപാടികളും അരങ്ങേറി. 50,000 പേര്ക്ക് ഇരിക്കാനുള്ള സൗകര്യമാണ് ചടങ്ങ് നടക്കുന്ന എന്ആര്ജി സ്റ്റേഡിയത്തിലുള്ളത്.
ഒരു രാഷ്ട്ര നേതാവിന് വേണ്ടി സമീപ കാലത്ത് ഹൂസ്റ്റണില് നടക്കുന്ന ഏറ്റവും വലിയ പരിപാടിയാണ് ഹൗഡി മോദി. സുഹൃത്ത് മോദിക്കൊപ്പം വേദി പങ്കിടാന് പോകുന്നതായി പരിപാടിക്കെത്തും മുന്പ് ട്രംപ് ട്വീറ്റ് ചെയ്തു. ഹൂസ്റ്റണിലേത് മഹത്തായ ദിനമാണെന്ന് മോദി പറഞ്ഞു. ഡെമോക്രാറ്റിക്, റിപ്പബ്ലിക്കന് പാര്ട്ടി നേതാക്കളും സെനറ്റ് അംഗങ്ങളും പരിപാടിയില് പങ്കെടുക്കുന്നു എന്നത് ശ്രദ്ധേയമാണ്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates