പച്ചനിറമുള്ള ഇലച്ചാര്‍ത്തുകള്‍ക്കിടയില്‍ ചിതറിക്കിടക്കുന്ന പര്‍പ്പിളും വെള്ളയും ഇടകലര്‍ന്ന നക്ഷത്രക്കൂട്ടങ്ങള്‍! പര്‍പ്പിളും ഇളം പിങ്കു നിറവും ചേര്‍ന്ന് കണ്ണുകള്‍ക്ക് വിസ്മയം തീര്‍ക്കുന്ന പൂങ്കുലകള്‍! പൂന്തോട്ടങ്ങള്‍ക്കു പ്രത്യേക ചാരുതയും ആകര്‍ഷണീയതയും നല്‍കുന്ന ഈ അലങ്കാരച്ചെടിയാണ് 'സ്റ്റാര്‍ബസ്റ്റ് ബുഷ്'' (Starburst bush) അഥവാ ക്ലെറോഡെന്‍ഡ്രം ക്വാഡ്രിലോക്കുലാറെ (Clerodendrum quadriloculare). അതിമനോഹരമായ പൂക്കളാല്‍ കാഴ്ചയില്‍ വിസ്മയം ജനിപ്പിക്കുന്നവയാണ് ഈ അലങ്കാര സസ്യം. പൂക്കാലമെത്തുമ്പോള്‍, നീളമേറിയതും നേര്‍ത്തതുമായ പിങ്ക് കലര്‍ന്ന പര്‍പ്പിള്‍ നിറത്തിലുള്ള കുഴല്‍ രൂപത്തിലുള്ള ഭാഗങ്ങളുടെ അഗ്രഭാഗത്ത് നക്ഷത്രാകൃതിയിലുള്ള വെളുത്ത പൂക്കള്‍ വിരിഞ്ഞിറങ്ങുന്നു. ഇതിലെ കേസരങ്ങള്‍ പൂക്കളുടെ പുറത്തേക്ക് നീണ്ടുനില്‍ക്കുന്നതും കൂടിയാകുമ്പോള്‍ ഒരു നക്ഷത്ര വിസ്‌ഫോടനം പോലെ നയനമനോഹരമായ ഒരു കാഴ്ചയിലേക്ക് നമ്മെ നയിക്കുന്നു. വലിയ കൂട്ടങ്ങളായി വിരിയുന്ന ആകര്‍ഷകമായ ഈ പൂക്കള്‍, പച്ചപ്പാര്‍ന്ന ഇലകള്‍ക്കിടയില്‍ വര്‍ണ്ണപ്രപഞ്ചം തീര്‍ക്കുകയും മാസ്മരികത സൃഷ്ടിക്കുകയും ചെയ്യുന്നു.
ഫിലിപ്പീന്‍സിലും ന്യൂ ഗിനിയയിലും കണ്ടുവരുന്ന, കാഴ്ചയില്‍ അതിമനോഹരമായ ഒരു അലങ്കാരച്ചെടിയാണ് 'സ്റ്റാര്‍ബസ്റ്റ് ബുഷ്'. ക്ലെറോഡെന്‍ഡ്രം ക്വാഡ്രിലോക്കുലാറെ (Clerodendrum quadriloculare) എന്ന ശാസ്ത്രീയ നാമത്തില്‍ അറിയപ്പെടുന്ന ഈ ചെടി, സ്റ്റാര്‍ബേര്‍സ്റ്റ് ക്ലെറോഡെന്‍ഡ്രം, സ്റ്റാര്‍ബേര്‍സ്റ്റ് ബുഷ്, ഷൂട്ടിങ് സ്റ്റാര്‍, ഷൂട്ടിങ് സ്റ്റാര്‍ ക്ലെറോഡെന്‍ഡ്രം, ഫയര്‍വര്‍ക്ക്‌സ് പ്ലാന്റ്, ഫിലിപ്പൈന്‍ ഗ്ലോറിബവര്‍, ബ്രോണ്‍സ് ലീവ്ഡ് ക്ലെറോഡെന്‍ഡ്രം, സ്റ്റാര്‍ബേര്‍സ്റ്റ് ഗ്ലോറിബവര്‍, വിന്റര്‍ ബര്‍സ്റ്റ്, ഫിലിപ്പിനോയില്‍ ബാഗവാക് മൊറാഡോ എന്നിങ്ങനെ നിരവധി പേരുകളില്‍ അറിയപ്പെടുന്നു. മനോഹരമായ പൂക്കളും ആകര്‍ഷകമായ ഇലകളുമാണ് ഈ ചെടിയുടെ പ്രത്യേകത. ഇതിന്റെ വലിയ, കടും പച്ച നിറത്തിലുള്ള ഇലകളുടെ അടിഭാഗത്ത് പലപ്പോഴും നേരിയ പര്‍പ്പിള്‍ നിറം കാണാം. ഇളം പിങ്ക്, പര്‍പ്പിള്‍, വെള്ള നിറങ്ങളിലുള്ള പൂക്കളും നീളത്തില്‍ പുറത്തേക്ക് തള്ളിനില്‍ക്കുന്ന കേസരങ്ങളും സ്റ്റാര്‍ബസ്റ്റ് ബുഷ്' എന്ന പേര് അന്വര്‍ത്ഥമാക്കുന്ന ഒരു നക്ഷത്രവിസ്ഫോടനത്തിന്റെ പ്രതീതി സൃഷ്ടിക്കുന്നു. ഭംഗിയുള്ള പൂങ്കുലകള്‍ ഇതിനെ അലങ്കാരച്ചെടിയായി ജനപ്രിയമാക്കുന്നു.
എന്നാല്‍ അനുകൂല കാലാവസ്ഥയിലും സാഹചര്യങ്ങളിലും ഈ ചെടി നട്ടുപിടിപ്പിച്ച സ്ഥലങ്ങളില്‍ നിന്ന് പുറത്തുകടന്ന് സ്വാഭാവിക പരിസ്ഥിതിയിലേക്ക് പടരാന്‍ സാധ്യതയുണ്ട്. അവ തദ്ദേശീയ സസ്യങ്ങളുടെ വളര്‍ച്ചയെ തടയുകയും, പ്രകൃതിദത്തമായ സസ്യസമൂഹങ്ങളെ ഇല്ലാതെയാക്കുകയും പ്രാദേശിക ജൈവവൈവിധ്യത്തിന് ഭീഷണിയാവുകയും ചെയ്യുന്നു.
അറിയണം സ്റ്റാര്‍ബസ്റ്റ് ബുഷ്'എന്ന അലങ്കാരച്ചെടിയെ
സ്റ്റാര്‍ബര്‍സ്റ്റ് ബുഷ് (ക്ലെറോഡെന്‍ഡ്രം ക്വാഡ്രിലോകുലാരെ), ലാമിയേസി കുടുംബത്തിലും ക്ലെറോഡെന്‍ഡ്രം (Clerodendrum) ജനുസ്സിലും പെടുന്ന പൂക്കളുണ്ടാകുന്ന കുറ്റിച്ചെടിയാണ്. അനുകൂലമായ സാഹചര്യങ്ങളില്‍ ഇതൊരു ചെറിയ മരമായി വളരാനും സാധ്യതയുണ്ട്. ഇത് സാധാരണയായി രണ്ടു മുതല്‍ അഞ്ചു മീറ്റര്‍ വരെ ഉയരത്തില്‍ വളരുന്നു. ഇതിന്റെ തണ്ടുകള്‍ തുടക്കത്തില്‍ പച്ചനിറത്തിലും മൃദുവായും ഇരിക്കുമെങ്കിലും വളര്‍ച്ചയെത്തുന്നതോടെ തടിപോലെ ഉറച്ചതും തവിട്ടുനിറമുള്ളതുമായി മാറുന്നു. ശാഖകള്‍ വശങ്ങളിലേക്ക് പടര്‍ന്ന് വിശാലമായ ഒരു മേലാപ്പ് രൂപപ്പെടുന്നു.
ഇലകള്‍ വീതിയുള്ളതും നീളമേറിയതും സാധാരണയായി ദീര്‍ഘവൃത്താകൃതിയിലുള്ളതുമാണ്. എതിര്‍ ജോഡികളായി ക്രമീകരിച്ചിരിക്കുന്ന ഇലകള്‍ക്ക് സാധാരണയായി 12 മുതല്‍ 25 സെന്റീമീറ്റര്‍ വരെ നീളവും 3.5 മുതല്‍ 12.5 സെന്റീമീറ്റര്‍ വരെ വീതിയുമുണ്ടാകും. മുകള്‍ഭാഗം കടും പച്ചയും അടിഭാഗം ഇരുണ്ട പര്‍പ്പിള്‍ അല്ലെങ്കില്‍ ചുവപ്പ് കലര്‍ന്ന പര്‍പ്പിള്‍ അല്ലെങ്കില്‍ വെങ്കല നിറവുമാണ്. പല്ലുകള്‍ പോലെയുള്ള അരികുകള്‍ ഇതിന്റെ പ്രത്യേകതയാണ്.
സ്റ്റാര്‍ബസ്റ്റ് ബുഷ് എന്ന ചെടിയുടെ ഏറ്റവും ആകര്‍ഷകമായ സവിശേഷത അതിന്റെ പൂക്കളാണ്. ഈ സസ്യത്തിന്റെ അഗ്രഭാഗത്തായി, തിങ്ങിനിറഞ്ഞ പൂങ്കുലകള്‍ കാണപ്പെടുന്നു. ഇവയുടെ പൂക്കള്‍ കുഴല്‍ രൂപത്തിലുള്ളവയാണ്. ഓരോ പൂവിനും 6 മുതല്‍ 8 സെന്റീമീറ്റര്‍ വരെ നീളമുള്ള, നേര്‍ത്ത, പിങ്ക് അല്ലെങ്കില്‍ പര്‍പ്പിള്‍ കലര്‍ന്ന നിറത്തിലുള്ള കുഴല്‍പോലെയുള്ള അടിഭാഗമുണ്ട്. കുഴല്‍ഭാഗത്തിന് ചുറ്റും ഒരു നക്ഷത്രത്തിന്റെ ആകൃതിയില്‍ ഇതിന്റെ അഞ്ച് വെള്ള ഇതളുകള്‍ ക്രമീകരിക്കപ്പെട്ടിരിക്കുന്നു. നാലോ അഞ്ചോ കേസരങ്ങളും കേസരങ്ങളും (stamens) ഒരു ജനിയും (style) പൂവില്‍ നിന്ന് പുറത്തേക്ക് നീണ്ടുനില്‍ക്കുന്ന രീതിയിലാണ് കാണപ്പെടുന്നത്. മിക്ക ചെടികളിലും ഉഭയലിംഗ (bisexual) പൂക്കളാണ് കാണപ്പെടുന്നതെങ്കിലും, ഏകലിംഗ (unisexual) പൂക്കളും ഉണ്ടാകാം. ചിത്രശലഭങ്ങള്‍, തേനീച്ചകള്‍, പൂന്തേന്‍ കുടിക്കുന്ന മറ്റ് പ്രാണികള്‍ തുടങ്ങി പരാഗണം നടത്തുന്ന വിവിധ ജീവികളെ ആകര്‍ഷിക്കുന്നു.
പരാഗണം വിജയകരമായി നടന്നാല്‍, മാംസളമായ, പര്‍പ്പിള്‍ നിറത്തിലുള്ള ഫലങ്ങള്‍ ഉണ്ടായേക്കാം; എന്നാല്‍ എല്ലാ സസ്യങ്ങളിലും ഫലങ്ങള്‍ ഉണ്ടാകണമെന്നില്ല. പഴങ്ങള്‍ സാധാരണയായി ദീര്‍ഘവൃത്താകൃതിയിലുള്ളതോ ഗോളാകൃതിയിലുള്ളതോ ആയിരിക്കും. ഏകദേശം ഒന്നു മുതല്‍ ഒന്നര സെന്റീമീറ്റര്‍ നീളമുണ്ടാകും. തുടക്കത്തില്‍ പച്ചനിറവും പാകമാകുമ്പോള്‍ ക്രമേണ പര്‍പ്പിള്‍ നിറത്തിലേക്കും മാറുന്നു. പഴത്തിന് ചുറ്റുമുള്ള തൊലി പലപ്പോഴും ചുവപ്പായി മാറുന്നു. മാംസളമായ ഫലങ്ങള്‍ക്കുള്ളിലെ മുളയ്ക്കാന്‍ ശേഷിയുള്ള വിത്തുകള്‍ സസ്യത്തിന്റെ ലൈംഗിക പ്രജനനത്തിനും സ്വാഭാവിക വ്യാപനത്തിനും സഹായിക്കുന്നു. പാകമായ ഫലങ്ങള്‍ പക്ഷികളും മൃഗങ്ങളും ഭക്ഷിക്കുകയും പിന്നീട് വിസര്‍ജ്ജ്യത്തിലൂടെ വിത്തുകള്‍ പുതിയ സ്ഥലങ്ങളിലെത്തിച്ചേരുകയും ചെയ്യുന്നു.
ഉഷ്ണമേഖലാ, ഉപോഷ്ണമേഖലാ കാലാവസ്ഥകളാണ് ഈ ചെടിയുടെ വളര്‍ച്ചയ്ക്ക് ഏറ്റവും അനുയോജ്യം. പൂര്‍ണ്ണമായ സൂര്യപ്രകാശത്തിലോ ഭാഗികമായ തണലിലോ ഇവ നന്നായി വളരുന്നു. ആവശ്യത്തിന് ഈര്‍പ്പവും നല്ല നീര്‍വാര്‍ച്ചയുമുള്ള മണ്ണാണെങ്കില്‍, വിവിധതരം മണ്ണുകളില്‍ ഇവയ്ക്ക് വളരാന്‍ സാധിക്കും. വേഗത്തില്‍ വളരാനും, ഭൂമിക്കടിയിലുള്ള വേരുകളില്‍ നിന്ന് വീണ്ടും മുളയ്ക്കാനും, മാതൃസസ്യത്തിന് ചുറ്റും പുതിയ തൈകള്‍ ഉണ്ടാക്കാനും ഇതിന് കഴിവുണ്ട്. ഈ സവിശേഷതകള്‍ കാരണം, ഇതൊരു നല്ല അലങ്കാരച്ചെടിയായി നിലനില്‍ക്കുമ്പോള്‍ തന്നെ, അനുകൂലമായ ഉഷ്ണമേഖലാ സാഹചര്യങ്ങളില്‍ അനിയന്ത്രിതമായി പടര്‍ന്നുപിടിക്കുന്ന ഒരു സസ്യമായും ഇത് മാറിയേക്കാം.
അലങ്കാര മൂല്യത്തിന് പുറമേ, ഈ ചെടി ഫിലിപ്പീന്‍സില്‍ പരമ്പരാഗത വൈദ്യശാസ്ത്രത്തില്‍ ഉപയോഗിക്കുന്നതായി പറയപ്പെടുന്നു. പ്രത്യേകിച്ച്, തദ്ദേശീയരായ 'അതി' (Ati) ജനവിഭാഗങ്ങള്‍ക്കിടയില്‍, തലവേദനയും ചര്‍മ്മത്തിലെ അലര്‍ജികളും ശമിപ്പിക്കുന്നതിനായി ഇതിന്റെ ഇലകള്‍ പുറമെ പുരട്ടാറുണ്ട്. മുറിവുകള്‍ ഉണക്കുന്നതിനും വ്രണങ്ങള്‍ ചികിത്സിക്കുന്നതിനും പരമ്പരാഗത ഔഷധരീതികളില്‍ ഈ ഇലകള്‍ ഉപയോഗിക്കുന്നതായി കാണാം. ചില പരമ്പരാഗത ചികിത്സാവിധികളില്‍, ശരീരത്തിന് ഉന്മേഷം നല്‍കുന്ന ഗുണങ്ങളുള്ളതിനാല്‍, കുളിക്കാനുള്ള വെള്ളത്തില്‍ ഈ ഇലകള്‍ ചേര്‍ക്കാറുണ്ട്. ഇത്തരം ഉപയോഗങ്ങള്‍ പരമ്പരാഗത അറിവുകളെ അടിസ്ഥാനമാക്കിയുള്ളവയാണ്.
വ്യാപനത്തിന്റെ വഴികള്‍
സ്റ്റാര്‍ബേര്‍സ്റ്റ് ബുഷിന്റെ അധിനിവേശ സ്വഭാവത്തിനു കാരണം അതിന്റെ അസാധാരണമായ വ്യാപനശേഷിയാണ്. സ്റ്റാര്‍ബേര്‍സ്റ്റ് ബുഷ് പ്രധാനമായും രണ്ട് രീതികളിലൂടെയാണ് പ്രത്യുല്‍പ്പാദനം നടത്തുന്നത്. വിത്തുകള്‍ വഴിയുള്ള ലൈംഗിക പ്രത്യുല്‍പ്പാദനവും, ഭൂഗര്‍ഭ വേരുകളില്‍ നിന്നുണ്ടാകുന്ന മുളകള്‍ (root suckers) വഴിയുള്ള അലൈംഗിക അഥവാ കായിക പ്രജനനം (vegetative) പ്രത്യുല്‍പ്പാദനവും.
മാംസളമായ ഫലങ്ങള്‍ക്കുള്ളിലെ മുളയ്ക്കാന്‍ ശേഷിയുള്ള വിത്തുകള്‍ സസ്യത്തിന്റെ ലൈംഗിക പ്രജനനത്തിനും സ്വാഭാവിക വ്യാപനത്തിനും സഹായിക്കുന്നു. പാകമായ ഫലങ്ങള്‍ പക്ഷികളും മൃഗങ്ങളും ഭക്ഷിക്കുകയും പിന്നീട് വിസര്‍ജ്ജ്യത്തിലൂടെ വിത്തുകള്‍ പുതിയ സ്ഥലങ്ങളിലെത്തിച്ചേരുകയും ചെയ്യുന്നു. അനുകൂല സാഹചര്യത്തില്‍ വിത്തുകള്‍ മുളച്ച് പുതിയ ചെടികളായി തീരുന്നു.
വേരുകളില്‍ നിന്ന് പുതിയ മുളകള്‍ (root suckers) ഉണ്ടാകുകയും പുതിയ ചെടികളായി മാറുകയും ചെയ്യുന്നു. ഇങ്ങനെ വേരുകളില്‍ നിന്ന് അനേകം മുളകള്‍ പൊട്ടി ഇതിന്റെ കൂട്ടങ്ങള്‍ രൂപപ്പെടുന്നു. കൂടാതെ, മണ്ണ്, പൂന്തോട്ടത്തിലെ അവശിഷ്ടങ്ങള്‍, അലങ്കാര സസ്യങ്ങളുടെ കൈമാറ്റം എന്നിവയിലൂടെയും വിത്തുകളും വേരിന്റെ കഷ്ണങ്ങളും മറ്റ് സ്ഥലങ്ങളിലേക്ക് വ്യാപിക്കാം.
ഈ ചെടിയുടെ വ്യാപനത്തിന് മനുഷ്യരാണ് പ്രധാന കാരണം എന്നു തന്നെ പറയേണ്ടി വരും. പൂന്തോട്ടങ്ങളിലെ സൗന്ദര്യത്തിനായി നട്ടുപിടിപ്പിക്കുന്ന ചെടികള്‍ പിന്നീട് നിയന്ത്രണമില്ലാതെ സമീപപ്രദേശങ്ങളിലേക്ക് വ്യാപിക്കുന്നു. ചെടിയുടെ കൊമ്പുകളും വേരുകളും മറ്റിടങ്ങളിലേക്ക് മാറ്റി നട്ടുപിടിപ്പിക്കുന്നതും തോട്ടത്തിലെ മാലിന്യങ്ങള്‍ ശരിയായി സംസ്‌കരിക്കാതെ സമീപത്തെ ഒഴിഞ്ഞ സ്ഥലങ്ങളിലോ നദീതീരത്തോ ഉപേക്ഷിക്കുന്നതും പുതിയ അധിനിവേശ കേന്ദ്രങ്ങള്‍ രൂപപ്പെടാന്‍ കാരണമാകുന്നു. പലപ്പോഴും അലങ്കാരച്ചെടികളോടുള്ള അമിതമായ താല്‍പര്യവും പരിസ്ഥിതിക്ക് ഉണ്ടാക്കുന്ന ദീര്‍ഘകാല പ്രത്യാഘാതങ്ങളെക്കുറിച്ച് പൊതുജനങ്ങള്‍ക്ക് മതിയായ അവബോധമില്ലാത്തതും ഈ ചെടിയെ കൂടുതല്‍ പ്രദേശങ്ങളിലേക്ക് വ്യാപിപ്പിക്കുന്നു.
സ്റ്റാര്‍ബേര്‍സ്റ്റ് ബുഷ് അപകടകാരിയാകുന്നതെങ്ങനെ
സ്റ്റാര്‍ബേര്‍സ്റ്റ് ബുഷ് എന്ന അലങ്കാര സസ്യം, പ്രത്യേകിച്ച് ഉഷ്ണമേഖലാ, ഉപോഷ്ണമേഖലാ പ്രദേശങ്ങളില്‍, വളരെ വേഗത്തില്‍ പടര്‍ന്നുപിടിക്കാനും അധിനിവേശ സ്വഭാവം കാണിക്കാനും സാധ്യതയുള്ള ഒന്നാണ്. ഇതിന്റെ അതിശക്തമായ വളര്‍ച്ചാശേഷി, വിപുലമായ വേരുപടലം, ഭൂമിക്കടിയില്‍ നിന്ന് പുതിയ തൈകള്‍ (suckers) ഉല്‍പ്പാദിപ്പിക്കാനുള്ള കഴിവ് എന്നിവ കാരണം, നട്ടുപിടിപ്പിച്ച സ്ഥലത്തുനിന്ന് വളരെ വേഗത്തില്‍ മറ്റ് ഇടങ്ങളിലേക്ക് വ്യാപിക്കാന്‍ ഇതിന് സാധിക്കുന്നു. ഭൂമിക്കടിയിലുള്ള വേരുകളില്‍ നിന്നും തണ്ടുകളില്‍ നിന്നും പുതിയ മുളകള്‍ ഉണ്ടാകാനുള്ള കഴിവാണ് ഇതിന്റെ ഏറ്റവും പ്രധാനപ്പെട്ട അധിനിവേശ സവിശേഷത. ഇത് മാതൃസസ്യത്തിന് ചുറ്റും ഇടതൂര്‍ന്ന കൂട്ടങ്ങള്‍ രൂപപ്പെടാന്‍ കാരണമാകുന്നു. മുകള്‍ഭാഗത്തുള്ള തണ്ടുകള്‍ വെട്ടിമാറ്റിയാലും, മണ്ണിലുള്ള വേരുകളില്‍ നിന്ന് പുതിയ മുളകള്‍ ഉണ്ടാകാന്‍ സാധ്യതയുള്ളതിനാല്‍, ഈ സസ്യത്തെ പൂര്‍ണ്ണമായും നീക്കം ചെയ്യുക എന്നത് വളരെ പ്രയാസകരമാണ്.
ധാരാളം വിത്തുകള്‍ ഉല്‍പ്പാദിപ്പിക്കാനുള്ള കഴിവാണ് ഇതിന്റെ അധിനിവേശ സാധ്യത വര്‍ദ്ധിപ്പിക്കുന്ന മറ്റൊരു ഘടകം. അനുകൂല സാഹചര്യങ്ങളില്‍, ഈ സസ്യം മുളയ്ക്കാന്‍ ശേഷിയുള്ള വിത്തുകള്‍ ഉല്‍പ്പാദിപ്പിക്കുന്നു. പക്ഷികളും മറ്റ് മൃഗങ്ങളും വഴി ഈ വിത്തുകള്‍ ദൂരസ്ഥലങ്ങളിലേക്ക് എത്തുകയും, അവിടെ പുതിയ സസ്യങ്ങള്‍ വളരാന്‍ കാരണമാവുകയും ചെയ്യുന്നു. കൂടാതെ, മണ്ണ്, പൂന്തോട്ടത്തിലെ അവശിഷ്ടങ്ങള്‍, അലങ്കാര സസ്യങ്ങളുടെ കൈമാറ്റം എന്നിവയിലൂടെയും വിത്തുകളും വേരിന്റെ കഷ്ണങ്ങളും മറ്റ് സ്ഥലങ്ങളിലേക്ക് വ്യാപിക്കാം. ഭാഗികമായ തണലിലും വളരാനുള്ള കഴിവുള്ളതിനാല്‍, മരത്തണലുകളിലും വനത്തിന്റെ അരികുകളിലും റോഡരികുകളിലും ഒഴിഞ്ഞുകിടക്കുന്ന ഭൂമിയിലും ഇവയ്ക്ക് നിലനില്‍ക്കാന്‍ സാധിക്കുന്നു. ഒരിക്കല്‍ ഒരിടത്ത് വേരുറപ്പിച്ചു കഴിഞ്ഞാല്‍, സൂര്യപ്രകാശം, ഈര്‍പ്പം, പോഷകങ്ങള്‍, സ്ഥലം എന്നിവയ്ക്കായി മത്സരിച്ചുകൊണ്ട്, തദ്ദേശീയ സസ്യങ്ങളുടെ വളര്‍ച്ചയെയും പുനരുജ്ജീവനത്തെയും ഇവ തടസ്സപ്പെടുത്തുന്നു. മാത്രമല്ല, വെട്ടിമാറ്റിയാലും വീണ്ടും വളരാനുള്ള കഴിവ് ഇതിനെ നിയന്ത്രിക്കുന്നത് കൂടുതല്‍ ദുഷ്‌കരമാക്കുന്നു. അതിവേഗ വളര്‍ച്ച, കായിക പ്രജനനം, വിത്തുകള്‍ വഴിയുള്ള വ്യാപനം, വ്യത്യസ്ത പരിസ്ഥിതികളോട് പൊരുത്തപ്പെടാനുള്ള കഴിവ് എന്നിവയെല്ലാം ചേര്‍ന്ന്, ഉഷ്ണമേഖലാ ആവാസവ്യവസ്ഥകളില്‍ 'ക്ലെറോഡെന്‍ഡ്രം ക്വാഡ്രിലോക്കുലാര്‍' (Clerodendrum quadriloculare) എന്ന ഈ സസ്യത്തെ ഗുരുതരമായ ഒരു പാരിസ്ഥിതിക കളയായി (environmental weed) മാറ്റുന്നു.
കേരളം പോലുള്ള ഉഷ്ണമേഖലാപ്രദേശങ്ങളിലെ അപകടസാധ്യത
അലങ്കാരച്ചെടിയായി വ്യാപകമായി വിലമതിക്കപ്പെടുന്ന സ്റ്റാര്‍ബസ്റ്റ് ബുഷ് കേരളം പോലുള്ള ഉഷ്ണമേഖലാ പരിസ്ഥിതികളില്‍ അധിനിവേശ സ്വഭാവം (invasive nature) കാണിക്കാന്‍ സാധ്യതയുള്ള സസ്യമാണ്. കേരളത്തിലെ ഉയര്‍ന്ന താപനില, ഈര്‍പ്പമുള്ള കാലാവസ്ഥ, സമൃദ്ധമായ മഴ, വളര്‍ച്ചയ്ക്ക് അനുകൂലമായ സാഹചര്യങ്ങള്‍ എന്നിവ ഈ ചെടിയുടെ അതിവേഗ വളര്‍ച്ചയ്ക്കും നിലനില്‍പ്പിനും വളരെയധികം സഹായിക്കുന്നു. ഭൂമിക്കടിയിലുള്ള വേരുകളില്‍ നിന്ന് പുതിയ തൈകള്‍ മുളപ്പിച്ചുകൊണ്ട് വംശവര്‍ദ്ധന നടത്താനുള്ള ഇതിന്റെ കഴിവ് വളരെ ശക്തമാണ്. പ്രധാന തണ്ട് വെട്ടിമാറ്റിയാലും, ഭൂമിക്കടിയില്‍ അവശേഷിക്കുന്ന വേരുകളില്‍ നിന്ന് വീണ്ടും പുതിയ തൈകള്‍ മുളച്ചു വരാന്‍ കഴിയുന്നതിനാല്‍, ഈ ചെടിയെ നിയന്ത്രിക്കുക എന്നത് വളരെ പ്രയാസകരമാണ്. സൂര്യപ്രകാശം ലഭിക്കുന്ന ഇടങ്ങളിലും ഭാഗികമായി തണലുള്ള സ്ഥലങ്ങളിലും ഒരുപോലെ വളരാനുള്ള കഴിവ് വിവിധയിടങ്ങളില്‍ വേരുറപ്പിക്കാന്‍ ഇതിനെ പ്രാപ്തമാക്കുന്നു.
പക്ഷികളും മറ്റ് മൃഗങ്ങളും വിത്തുകള്‍ ദൂരേക്ക് എത്തിക്കുന്നതിലൂടെ ഈ ചെടി അതിന്റെ യഥാര്‍ത്ഥ നടീല്‍ പ്രദേശങ്ങളില്‍ നിന്നും വളരെ അകലെയുള്ള പ്രദേശങ്ങളില്‍ വ്യാപിക്കുവാന്‍ ഇടയാകുന്നു. കേരളത്തില്‍, ഈ അലങ്കാര സസ്യം ചുറ്റുമുള്ള ആവാസ വ്യവസ്ഥകളിലേക്ക് രക്ഷപ്പെടുന്നത് ഒരു പാരിസ്ഥിതിക ആശങ്കയായി മാറിയേക്കാം. ഒരിക്കല്‍ സ്ഥാപിതമായാല്‍, ഇടതൂര്‍ന്നു വളരുകയും സൂര്യപ്രകാശം, പോഷകങ്ങള്‍, ഈര്‍പ്പം, വളരുന്ന സ്ഥലം എന്നിവയ്ക്കായി തദ്ദേശീയ സസ്യങ്ങളുമായി മത്സരിക്കുകയും അതുവഴി തദ്ദേശീയ സസ്യങ്ങളുടെ പുനരുജ്ജീവനത്തെ നിയന്ത്രിക്കുകയും ചെയ്യുന്നു. വെട്ടിമാറ്റിയതിനു ശേഷവുമുള്ള അതിന്റെ ശക്തമായ പുനര്‍വളര്‍ച്ച പരിപാലനത്തിന്റെ ബുദ്ധിമുട്ട് വര്‍ദ്ധിപ്പിക്കുന്നു.
സ്വദേശവും അധിനിവേശപ്രദേശങ്ങളും
സ്റ്റാര്‍ബര്‍സ്റ്റ് ബുഷ് (ക്ലെറോഡെന്‍ഡ്രം ക്വാഡ്രിലോകുലേര്‍) തെക്കുകിഴക്കന്‍ ഏഷ്യയിലെയും ഓഷ്യാനിയയിലെയും ഉഷ്ണമേഖലാ പ്രദേശങ്ങളില്‍ നിന്നുള്ളതാണ്. ക്യൂവിലെ റോയല്‍ ബൊട്ടാണിക് ഗാര്‍ഡന്‍സ് അനുസരിച്ച്, അതിന്റെ സ്വാഭാവിക വിതരണത്തില്‍ ഫിലിപ്പീന്‍സും ന്യൂ ഗിനിയയും ഉള്‍പ്പെടുന്നു. എന്നിരുന്നാലും, പരിചയപ്പെടുത്തിയ ചില പ്രദേശങ്ങളില്‍, ഇത് കൃഷിയില്‍ നിന്ന് രക്ഷപ്പെടുകയും സ്വാഭാവിക ആവാസ വ്യവസ്ഥകളില്‍ വളരുകയും ആക്രമണകാരിയായ ഒരു അധിനിവേശ സസ്യമായി മാറുകയും ചെയ്തു.
ഫ്‌ലോറിഡയും ഹവായിയും ഉള്‍പ്പെടെയുള്ള അമേരിക്കന്‍ പ്രദേശങ്ങള്‍, പ്യൂര്‍ട്ടോ റിക്കോ, ഗുവാം, വടക്കന്‍ മരിയാന ദ്വീപുകള്‍, ഫെഡറേറ്റഡ് സ്റ്റേറ്റ്‌സ് ഓഫ് മൈക്രോനേഷ്യ, പലാവു, ഫിജി, ഫ്രഞ്ച് പോളിനേഷ്യ, അമേരിക്കന്‍ സമോവ, സമോവ, മാര്‍ഷല്‍ ദ്വീപുകള്‍, കുക്ക് ദ്വീപുകള്‍, സിംഗപ്പൂര്‍, തുടങ്ങി നിരവധി ഉഷ്ണമേഖലാ, ഉഷ്ണമേഖലാ പ്രദേശങ്ങളില്‍ ഒരു അലങ്കാര സസ്യമായി ഇതിനെ പരിചയപ്പെടുത്തിയിട്ടുണ്ട്. മറ്റ് സസ്യ വിതരണ ഡാറ്റാബേസുകളും കരീബിയന്‍, മധ്യ അമേരിക്ക, തെക്കേ അമേരിക്ക, ഏഷ്യ എന്നിവിടങ്ങളിലെ പ്രദേശങ്ങളിലും അതിന്റെ പരിചയപ്പെടുത്തലോ കൃഷിയോ രേഖപ്പെടുത്തുന്നു.
ഫെഡറേറ്റഡ് സ്റ്റേറ്റ്‌സ് ഓഫ് മൈക്രോനേഷ്യ യിലെ പോണ്‍പൈയിലും കോസ്രേയിലും അധിനിവേശയിനമായും ഗുവാമിലും വടക്കന്‍ മരിയാന ദ്വീപുകളിലും ആക്രമണകാരിയായ ഒരു കളയായും റിപ്പോര്‍ട്ട് ചെയ്യപ്പെട്ടിട്ടുണ്ട്. ഹവായ്, യുഎസ്എ, എന്നിവിടങ്ങളില്‍ ആക്രമണകാരിയായ അല്ലെങ്കില്‍ ഉയര്‍ന്ന അപകടസാധ്യതയുള്ള പാരിസ്ഥിതിക കളയായി റിപ്പോര്‍ട്ട് ചെയ്യപ്പെട്ടിട്ടുണ്ട്. പോണ്‍പൈയിലും കോസ്രേയിലും ഈ ചെടി ആക്രമണകാരിയായി ഐ യു സി എന്‍ (IUCN) വിലയിരുത്തുന്നു. കുക്ക് ദ്വീപുകളില്‍ ജി ബി ഐ എഫ് (GBIF) ആക്രമണകാരിയായി രേഖപ്പെടുത്തിയിരിക്കുന്നു. പസഫിക് പ്രാദേശിക കള വിലയിരുത്തലുകള്‍ അതിന്റെ ആക്രമണാത്മക വ്യാപനത്തെയും വന ആവാസ വ്യവസ്ഥകളില്‍ ഇടതൂര്‍ന്ന കുറ്റിക്കാടുകള്‍ രൂപപ്പെടുത്താനുള്ള കഴിവിനെയും വിവരിക്കുന്നു.
അതിവേഗത്തിലുള്ള വളര്‍ച്ചയും, ഭൂഗര്‍ഭ വേരുകള്‍ വഴിയും വിത്തുകള്‍ വഴിയും പുതിയ തൈകള്‍ ഉല്‍പ്പാദിപ്പിക്കാനുള്ള കഴിവും ഉഷ്ണമേഖലാ ആവാസവ്യവസ്ഥകളിലേക്ക് ക്ലെറോഡെന്‍ഡ്രം ക്വാഡ്രിലോക്കുലാര്‍ എന്ന സസ്യം കടന്നുവന്നത് പാരിസ്ഥിതിക ആശങ്കകള്‍ക്ക് വഴിവെച്ചിട്ടുണ്ട്. പോണ്‍പേ (Pohnpei), കോസ്രേ (Kosrae) തുടങ്ങിയ സ്ഥലങ്ങളില്‍, ഈ സസ്യം ഇടതൂര്‍ന്ന കൂട്ടങ്ങളായി വളരുകയും, തദ്ദേശീയ സസ്യജാലങ്ങളെ അടിച്ചമര്‍ത്തുകയും, അവയുടെ സ്വാഭാവിക പുനരുജ്ജീവനത്തെ തടസ്സപ്പെടുത്തുകയും ചെയ്യുന്നു. തണലിലും വളരാനുള്ള കഴിവുള്ളതിനാല്‍, തുറസ്സായതും മനുഷ്യ ഇടപെടലുകളുള്ള സ്ഥലങ്ങളില്‍ മാത്രമല്ല, വനപ്രദേശങ്ങളിലും ഇവ വ്യാപിക്കുന്നു. ഇത്തരം സവിശേഷതകള്‍ കാരണം, ഉഷ്ണമേഖലാ ആവാസവ്യവസ്ഥകളിലെ ജൈവവൈവിധ്യ സംരക്ഷണത്തിന് ഇതൊരു വലിയ ഭീഷണിയായി മാറിയിരിക്കുന്നു.
നിയന്ത്രണവും പ്രതിരോധവും
സ്റ്റാര്‍ബര്‍സ്റ്റ് ബുഷിന്റെ ആക്രമണകരമായ സസ്യവളര്‍ച്ച, വിപുലമായ വേരുപടലം, മുറിച്ചതിനുശേഷം പുനരുജ്ജീവിക്കാനുള്ള കഴിവ് എന്നിവ ഇതിന്റെ നിയന്ത്രണം ബുദ്ധിമുട്ടുള്ളതാക്കുന്നു. കാരണം ചെടി മുറിച്ചതിനു ശേഷം അവശേഷിക്കുന്ന വേരുകളുടെ ചെറിയ ഭാഗങ്ങളില്‍ നിന്നു പോലും പുതിയ മുളകള്‍ പൊട്ടി പുതിയ ചെടികള്‍ ഉണ്ടാകാം. അതിനാല്‍ ഈ ചെടിയുടെ കൂടുതല്‍ വ്യാപനം തടയുന്നതിന് നേരത്തെയുള്ള തിരിച്ചറിയലും നീക്കം ചെയ്യലും അത്യാവശ്യമാണ്.
പരിസ്ഥിതിലോല പ്രദേശങ്ങളില്‍ ഈ സസ്യം നാടാതെയിരിക്കുക എന്നതാണ് ഏറ്റവും ഫലപ്രദമായ സമീപനം. വനങ്ങള്‍, തണ്ണീര്‍ത്തടങ്ങള്‍, തോട്ടങ്ങള്‍, മറ്റ് പ്രകൃതിദത്ത ആവാസ വ്യവസ്ഥകള്‍ എന്നിവയ്ക്ക് സമീപം ഇത് നടുന്നത് നിരുത്സാഹപ്പെടുത്തണം. സസ്യഭാഗങ്ങള്‍, റൂട്ട് സക്കറുകള്‍, പൂന്തോട്ട മാലിന്യങ്ങള്‍ എന്നിവ ഒരിക്കലും ഒഴിഞ്ഞ സ്ഥലങ്ങളിലോ വനമേഖലകളിലോ ജലപാതകളിലോ ഉപേക്ഷിക്കരുത്, കാരണം ഇത് കൂടുതല്‍ വ്യാപനത്തിന് കാരണമാകും.
പുനരുജ്ജീവനം തടയുന്നതിന്, ഭൂഗര്‍ഭ മുളകളും വേരുകളുടെ ശകലങ്ങളും ഉള്‍പ്പെടെ മുഴുവന്‍ വേരുപടലവും നീക്കം ചെയ്യാന്‍ ശ്രദ്ധിക്കണം. പുതുതായി പൊട്ടുന്ന മുളകള്‍ ആവര്‍ത്തിച്ച് നീക്കം ചെയ്യേണ്ടത് അത്യാവശ്യമാണ്, കാരണം ചെടിക്ക് അതിജീവിക്കുന്ന വേരുകളില്‍ നിന്ന് പുനരുജ്ജീവിക്കാന്‍ കഴിയും. തറനിരപ്പില്‍ തണ്ടുകള്‍ മുറിക്കുന്നത് പൊതുവെ ഫലപ്രദമല്ല. നീക്കം ചെയ്ത സസ്യവസ്തുക്കള്‍ ശേഖരിച്ച് ഉത്തരവാദിത്തത്തോടെ സംസ്‌കരിക്കണം. പുനരുജ്ജീവിക്കാന്‍ കഴിയുന്ന സ്ഥലത്ത് ഉപേക്ഷിക്കുകയോ കമ്പോസ്റ്റ് ചെയ്യുകയോ ചെയ്യരുത്.
മാതൃ കുറ്റിച്ചെടി നീക്കം ചെയ്തതിനുശേഷവും നിലനില്‍ക്കുന്ന ഭൂഗര്‍ഭ വേരുകളില്‍ നിന്ന് സസ്യത്തിന് പുനരുജ്ജീവിപ്പിക്കാന്‍ കഴിയുമെന്നതിനാല്‍ ദീര്‍ഘകാല നിരീക്ഷണം അത്യാവശ്യമാണ്. വീണ്ടും വളരുന്ന ചെടികള്‍ ഉടനടി നീക്കം ചെയ്യണം. പുതിയ വ്യാപനം തിരിച്ചറിയുന്നതിന് അയല്‍ പ്രദേശങ്ങള്‍ നിരീക്ഷിക്കുന്നതും പ്രധാനമാണ്.
അധിനിവേശ സസ്യങ്ങളെ നിയന്ത്രിക്കുന്നതില്‍ ഏറ്റവും ഫലപ്രദമായ മാര്‍ഗം പ്രതിരോധമാണ്. അധിനിവേശ സാധ്യതയുള്ള വിദേശ അലങ്കാരസസ്യങ്ങള്‍ വ്യാപകമായി നട്ടുപിടിപ്പിക്കുന്നത് ഒഴിവാക്കുകയും പകരം തദ്ദേശീയ അലങ്കാരസസ്യങ്ങള്‍ക്ക് മുന്‍ഗണന നല്‍കുകയും വേണം. കേരളത്തില്‍ ലഭ്യമായ നിരവധി തദ്ദേശീയ പൂച്ചെടികള്‍ സൗന്ദര്യത്തിലും പരാഗണ ജീവികളെ ആകര്‍ഷിക്കുന്നതിലും മികച്ചവയാണ്. ഇവയുടെ ഉപയോഗം പ്രോത്സാഹിപ്പിക്കുന്നത് ഉദ്യാനങ്ങളുടെ ഭംഗി നിലനിര്‍ത്തുന്നതിനൊപ്പം ജൈവവൈവിധ്യ സംരക്ഷണത്തിനും സഹായകമാകും.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates