ദുബൈ: വെല്ലിങ്ടണില്‍ ന്യൂസിലാന്‍ഡിനെതിരായ ടി20 മത്സരത്തിലെ തകര്‍പ്പന്‍ സെഞ്ച്വറിയുടെ കരുത്തില്‍ ഐസിസി പുരുഷ ടി20 ബാറ്റിങ് റാങ്കിങ്ങില്‍ ഇന്ത്യന്‍ ഓപ്പണര്‍ അഭിഷേക് ശര്‍മ വീണ്ടും ഒന്നാമത്. ഇഷാന്‍ കിഷനെ പിന്നിലാക്കിയാണ് അഭിഷേക് ഒന്നാം സ്ഥാനം തിരിച്ചുപിടിച്ചത്. മത്സരത്തില്‍ 38 പന്തില്‍ അഭിഷേക് 113 റണ്‍സ് അടിച്ചുകൂട്ടിയിരുന്നു. ഇതോടെ ടി20യില്‍ നാലാമത്തെ സെഞ്ച്വറിയും അഭിഷേക് കുറിച്ചു.
പരിക്കിനെ തുടര്‍ന്ന് അഞ്ച് മത്സരങ്ങളടങ്ങിയ പരമ്പരയിലെ രണ്ടാമത്തെയും മൂന്നാമത്തെയും മത്സരങ്ങളില്‍ ഇഷാന്‍ കിഷന്‍ കളിച്ചിരുന്നില്ല. റാങ്കിങ്ങില്‍ കിഷന്‍ മൂന്നാം സ്ഥാനത്തേക്ക് തള്ളപ്പെട്ടപ്പോള്‍ പാകിസ്ഥാന്‍ ടി20 ക്യാപ്റ്റന്‍ സാഹിബ്‌സാദ ഫര്‍ഹാനാണ് രണ്ടാമത്. ഇഷാന്‍ കിഷനെ മറികടക്കാന്‍ അഭിഷേക് ഒരു ഇന്നിങ്‌സ് മാത്രം മതിയായിരുന്നു.
897 റേറ്റിങ് പോയിന്റോടെയാണ് അഭിഷേക് ഒന്നാം സ്ഥാനത്തുള്ളത്. 883 പോയിന്റോടെ സാഹിബ്‌സാദ ഫര്‍ഹാന്‍ രണ്ടാമതും 866 പോയിന്റോടെ ഇഷാന്‍ കിഷനുമാണ് മൂന്നാമത്. അയര്‍ലന്‍ഡിനെതിരായ മികച്ച പ്രകടനത്തെ തുടര്‍ന്ന് കഴിഞ്ഞ ജൂലൈയിലായിരുന്നു അഭിഷേകിനെ പിന്നിലാക്കി ഇഷാന്‍ കിഷന്‍ ഒന്നാം റാങ്കിലെത്തിയിരുന്നത്. അതേസമയം, ഇന്ത്യന്‍ ടി20 ക്യാപ്റ്റന്‍ ശ്രേയസ് അയ്യര്‍ അഞ്ച് സ്ഥാനങ്ങള്‍ താഴേക്ക് ഇറങ്ങി റാങ്കിങ്ങില്‍ ഒമ്പതാമാണ്.
ടെസ്റ്റ് ക്രിക്കറ്റില്‍ ഓസ്ട്രേലിയയ്ക്കെതിരായ പരമ്പരയിലെ മികച്ച ഓള്‍റൗണ്ട് പ്രകടനത്തിന് പിന്നാലെ ദക്ഷിണാഫ്രിക്കന്‍ താരം മാര്‍ക്കോ യാന്‍സന്‍, ഇന്ത്യന്‍ താരം രവീന്ദ്ര ജഡേജയെ മറികടന്ന് ഒന്നാം നമ്പര്‍ ടെസ്റ്റ് ഓള്‍റൗണ്ടറായി. കൂടാതെ ലോകത്തിലെ ഒന്നാം നമ്പര്‍ ടെസ്റ്റ് ബൗളര്‍ പദവിയും യാന്‍സന്‍ സ്വന്തമാക്കി. ഓസ്ട്രേലിയന്‍ പേസര്‍ മിച്ചല്‍ സ്റ്റാര്‍ക്കിനെ രണ്ടാം സ്ഥാനത്തേക്ക് തള്ളിയാണ് യാന്‍സന്‍റെ നേട്ടം. നാല് വര്‍ഷത്തിലേറെയായി ജഡേജ നിലനിര്‍ത്തിയിരുന്ന ഒന്നാം സ്ഥാനമാണ് യാന്‍സന്‍ സ്വന്തമാക്കിയത്. മുന്‍ ദക്ഷിണാഫ്രിക്കന്‍ ഇതിഹാസം ഡെയ്ല്‍ സ്റ്റെയിന്‍ അടുത്തിടെ യാന്‍സനെ 'ലോകത്തിലെ ഏറ്റവും മികച്ച ക്രിക്കറ്റര്‍' എന്ന് വിശേഷിപ്പിച്ചിരുന്നു. ടെസ്റ്റ് ബൗളര്‍മാരുടെ റാങ്കിങ്ങില്‍ ഇന്ത്യന്‍ പേസ് കുന്തമുന ജസ്പ്രീത് ബുമ്ര ഒരു സ്ഥാനം താഴേക്ക് ഇറങ്ങി അഞ്ചാം സ്ഥാനത്തായി.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates