ധാക്ക: ബംഗ്ലാദേശ് പ്രീമിയര്‍ ലീഗിലെ മത്സരത്തിന് മുന്‍പ് ഗ്രൗണ്ടില്‍ വെച്ച് പുകവലിച്ച് അഫ്ഗാന്‍ താരം. മിനിസ്റ്റര്‍ ഗ്രൂപ്പ് ധാക്കയുടെ അഫ്ഗാന്‍ താരം മുഹമ്മദ് ഷെഹ്‌സാദ് ആണ് ഗ്രൗണ്ടില്‍ നിന്ന് പുകവലിച്ച് വിവാദ കുരുക്കിലായത്. 

ഗ്രൗണ്ടില്‍ വെച്ച് ഷെഹ്‌സാദ് പുകവലിക്കുന്ന വീഡിയോ വൈറലായിരുന്നു. ഷെഹ്‌സാദിനെ താക്കീത് ചെയ്യുകയും ഒരു ഡീമെറിറ്റ് പോയിന്റ് ചുമത്തുകയും ചെയ്തു. മാച്ച് റഫറിയുടേതാണ് തീരുമാനം. ഷെഹ്‌സാദ് തന്റെ കുറ്റം സമ്മതിച്ചു. 

ക്രിക്കറ്റിന്റെ മാന്യതയ്ക്ക് നിരക്കാത്തതാണ് ഷെഹ്‌സാദിന്റെ പ്രവര്‍ത്തി എന്ന് ചൂണ്ടിക്കാണിച്ചാണ് മാച്ച് റഫറിയുടെ നടപടി. മിനിസ്റ്റര്‍ ഗ്രൂപ്പ് ധാക്കയും കോമില്ല വിക്ടോറിയന്‍സും തമ്മിലുള്ള മത്സരം മഴയെ തുടര്‍ന്ന് തടസപ്പെട്ടിരുന്നു. മത്സരം ആരംഭിക്കുന്നത് വൈകുന്നതിന് ഇടയില്‍ കളിക്കാരില്‍ ചിലര്‍ ഗ്രൗണ്ടിലേക്ക് എത്തി. ഈ സമയമാണ് സഹതാരങ്ങള്‍ക്കൊപ്പം നിന്ന് ഷെഹ്‌സാദ് പുകവലിച്ചത്. 

ഗ്രൗണ്ടില്‍ വെച്ച് ഷെഹ്‌സാദ് പുകവലിക്കുന്നത് കണ്ട് ധാക്ക ടീം പരിശീലകന്‍ മിസാനുര്‍ റഹ്മാന്‍ താരത്തിന് മുന്നറിയിപ്പ് നല്‍കിയിരുന്നു. ബംഗ്ലാദേശ് താരം തമീം ഇക്ബാല്‍ ഷെഹ്‌സാദിനോട് ഡ്രസ്സിങ് റൂമിലേക്ക് പോകാനും ആവശ്യപ്പെട്ടിരുന്നു.